Norvegiya sudi 77 kishini o‘ldirgan Breyvikni muddatidan avval ozodlikka chiqarishni rad etdi

Norvegiyaning Telemark okrugi sudi neonatsist Andres Breyvikni muddatidan avval ozodlikka chiqarishni rad etdi.

Sud qarorida aytilishicha, Breyvikda tuzalish alomatlari ko‘zga tashlanmagan. 18 yanvar kuni bo‘lib o‘tgan sud komissiyasi majlisida Breyvik avvalgi majlislardagi kabi qo‘lini natsistlarcha uzatib salomlashgan.

Sudda Breyvik amalga oshirgan ommaviy qotilligi uchun radikalizm targ‘ibotchilarini aybladi.

«Miyamni zaharlashganida mening aybim yo‘q. 22 iyulda (2011 yil) sodir bo‘lgan voqealarda internetda odamlarning miyasini zaharlab, ularni radikallashtirayotganlar aybdor», - dedi u.

«Bularning barchasini ortda qoldirishga so‘z beraman. Ammo bu mening Norvegiya va G‘arbni natsionalistik-sotsial egallash uchun kurashmasligimni anglatmaydi», - deya Breyvikning so‘zlaridan iqtibos keltiradi Reuters agentligi.

Sud Breyvikni ozodlikka chiqarishni xavfli deb topdi.

«Uning ruhiy holati o‘zgarmagani sababli u 22 iyuldagi hujumga olib kelgan harakatlarini davom ettirishi xavfi mavjud», - deyiladi Telemark okrugi sudi bayonotida.

Anders Breyvik 2011 yil 22 iyulda Oslo markazida portlash sodir etishi natijasida sakkiz kishi halok bo‘lgan.

So‘ngra u yoshlar lageri joylashgan Utoyya oroliga yo‘l olgan va u yerdagilarga qarata o‘t ochgan. Oqibatda 69 kishi, asosan o‘smirlar halok bo‘lgan.

Keyinchalik u «Al-Qoida» kabi terrorchilikni amalga oshirishni: videokamera qarshisida Norvegiya sobiq bosh vaziri Harlem Bruntlandning boshini uzishni, bundan oldin esa uni tiz cho‘ktirib, rahm qilishini so‘rab yolvorishga majburlashni orzu qilganini aytgan.

Birvarakayiga 77 kishining o‘ldirilishi Norvegiyada Ikkinchi jahon urushidan buyon sodir etilgan eng qonli jinoyat bo‘lgan. Breyvik hali-hamon o‘zini bu harakati bilan oq tanlilarni multikulturalizm va migratsiyadan himoya qilgan shaxs deb hisoblaydi.

2012 yilda Breyvik 21 yilga ozodlikdan mahrum etilgan, keyinroq u o‘z tarafdorlari bilan uchrashish imkoniyatidan mosuvo qilishgani uchun huquqni himoya qilish tashkilotlariga shikoyat yo‘llagan. Uning bu shikoyati qanoatlantirilmagan.

Norvegiya qonunchiligiga ko‘ra, agar sud Breyvikni hali ham jamiyat uchun xavfli deb topsa, uning qamoqda qolish muddati nihoyasiga yetishi bilan yana uzaytirilishi mumkin. Reuters agentligining qayd etishicha, Breyvik har yili muddatidan avval ozodlikka chiqarishlari to‘g‘risida iltimosnoma berishi mumkin.