Buxoroda kabutar bo‘yicha mojaro oqibatida Lacetti yoqib yuborildi

2022 yil 6 fevraldan 7 fevralga o‘tar kechasi soat 02:58 da noma’lum shaxs Buxoro viloyati, G‘ijduvon tumani A.Donish ko‘chasidagi 78-uy oldida turgan, 37 yoshli B.F.ga tegishli Lacetti rusumli avtomashinaga tez yonuvchan yonilg‘i sepib, avtomashinani yoqib yuborgan va hodisa bo‘lgan joydan yashiringan.

IIV huzuridagi Tergov departamenti xabariga ko‘ra, holat yuzasidan G‘ijduvon tuman IIB huzuridagi Tergov bo‘limi tomonidan noma’lum shaxsga nisbatan Jinoyat kodeksning 173-moddasi 2-qismi “b” bandi (Mulkni qasddan nobud qilish yoki unga zarar yetkazish) bilan jinoyat ishi qo‘zg‘atilgan.

Olib borilgan tergov-tezkor harakatlari natijasida, ushbu jinoyatni G‘ijduvon tumanida yashovchi 33 yoshli R.A. va 45 yoshli Ya.A. sodir etgani aniqlangan.

«Tergov davomida jinoyatning kelib chiqish sababi o‘rganilganda, R.A. bir ko‘chada yashovchi jabrlanuvchi B.F. bilan bir necha kun oldin kabutar ustida o‘zaro janjallashgani, shundan so‘ng shu kuni tanishi Ya.A. bilan birga spirtli ichimlik iste’mol qilgan holda, tungi soat 2:50 larda 42 000 so‘m evaziga 5 litr hajmdagi yelim idishga benzin sotib olib, B.F.ning uyi oldida turgan avtomashina ustiga yonilg‘i sepib yoqib yuborgani ma’lum bo‘lgan.

Hozirda tergov harakatlari davom etmoqda», deyiladi ma’lumotda.