Foto: Bir qator viloyatlarning tog‘li tumanlarida qalin qor yog‘di

2022 yil 17-18 mart kunlari O‘zbekistonning bir qator viloyatlarida qor yog‘di. Jumladan, 17 mart kuni Navoiy, Buxoro viloyatlarida, 18 mart kuni Samarqand, Jizzax, Sirdaryo, Toshkent va Qashqadaryo viloyatlariga qor tushgan.

Tekisliklarga tushgan qor qisqa muddatda erib ketgan bo‘lsa, tog‘li tumanlarda 20 santimetrga yog‘gan. Ayniqsa, Jizzax viloyatining Zomin va Baxmal tumanlarida, Qashqadaryo viloyatining Kitob, Shahrisabz tumanlarining tog‘li qishloqlarida qorning qalinligi 15-20 santimetrga yetgan.

Avvalroq “O‘zgidromet” 19-20 martda kechalari havo harorati 0-3 daraja iliqqacha pasayishi, Buxoro, Navoiy, Toshkent, Samarqand, Jizzax, Sirdaryo viloyatlarida ba’zi joylarda havoda va tuproq yuzasida 1-2 daraja sovuqqacha bo‘lishi mumkinligi haqida ogohlantirgandi.