IHT Orol dengizi qurishi oqibatlarini bartaraf etishda yordam beradi 

Jidda shahrida (Saudiya Arabistoni) davlat rahbari tashrifi arafasida O‘zbekiston bosh vaziri o‘rinbosari – investitsiyalar va tashqi savdo vaziri Jamshid Xo‘jayevning Islom hamkorlik tashkiloti (IHT) bosh kotibi Hisseyn Braxim Taha bilan uchrashuvi bo‘lib o‘tdi.

Orol dengizi qurishi oqibatlarini bartaraf etish va mamlakat aholisi toza ichimlik suvidan foydalanish imkoniyatini kengaytirish choralarini nazarda tutgan holda, atrof-muhitni muhofaza qilish sohasida aniq loyihalarni amalga oshirish istiqbollari muhokama qilindi. Ushbu yo‘nalishlarda mavjud tajriba va ilg‘or texnologiyalar bilan tizimli ravishda almashish bo‘yicha kelishuvga erishildi.

Tomonlar O‘zbekistonning tashkilotga a’zo davlatlar bilan transport-logistika munosabatlarini rivojlantirish borasida yangi tashabbuslarni ishlab chiqish bo‘yicha sa’y-harakatlarni birlashtirish zarurligi to‘g‘risida kelishib oldi.

Uchrashuvda IHT va O‘zbekiston o‘rtasidagi hamkorlikni kengaytirishga qaratilgan amaliy hamkorlikni faollashtirish bo‘yicha kelishuvga erishildi. Tomonlar "Xiva – IHT 2024 sayyohlik poytaxti" tadbirlarini tashkil etish doirasida hamkorlik to‘g‘risidagi bitim yuzasidan kelishish va tasdiqlashni tezlashtirishga kelishib oldi.