Yanvar oyida magistraturadagi bo‘sh o‘rinlarga yana konkurs tashkil etiladi

Joriy o‘quv yili uchun magistraturaga qabul kvotasi soni 16 933 ta, 10 031 nafar talabgor hujjat topshirgan, shundan 5219 ta ariza qabul qilingan.

Mo‘min Ibodov

AOKAda bo‘lib o‘tgan brifingda Oliy va o‘rta maxsus ta’lim vazirligi axborot xizmati rahbari Mo‘min Ibodov 2022/2023 o‘quv yilida magistraturaga qabul jarayonlari natijalari bo‘yicha ma’lumot berdi.

Qayd etilishicha, magistraturaga qabul kvotasi to‘lmagan bo‘lsa-da, yangi joriy qilingan tartibga ko‘ra bu yildan magistraturaga qabul bir yilda 2 marotaba amalga oshiriladi, ya’ni yanvar oyiga bo‘sh o‘rinlarga yana konkurs tashkil etiladi.

Ro‘yxatdan o‘tgan 5219 nafar talabgorning 4582 nafari xorijiy til sertifikatiga ega. 637 nafar talabgor esa, tanlovda ishtirok etmaydigan turli imtiyozga ega bo‘lganlardir.

Shundan 296 nafari davlat stipendianti, 159 nafari kimyo, biologiya va informatika yo‘nalishlari bo‘yicha imtiyoz sohibi, 12 nafari kimyo, biologiya, fizika va informatika fan olimpiadalari g‘olibi sanaladi. 170 nafari esa ko‘zi ojizlar toifasiga kiruvchi a’lo baholarga o‘qigan bitiruvchidir.

Bundan oldin davlat oliy ta’lim muassasalari magistraturasiga qabul natijalari e’lon qilinayotgani xabar berilgandi.

#magistratura #konkurs