18:08 / 01.09.2022
9586

AEXA inspektorlari Zaporijjya AESga yetib kelishdi

Novooleksandrivka nazorat-o‘tkazish punktidagi kechikish va «kulrang» zonaga o‘tayotganda o‘qqa tutilganidan so‘ng, AEXA missiyasi Zaporijjya AESga yetib keldi. Inspektorlar u yerda bir necha kun ishlashga umid qilmoqda.

Foto: Reuters

Atom energiyasi bo‘yicha xalqaro agentlik (AEXA) missiyasi Rossiya qo‘shinlari tomonidan qo‘lga olingan Energodardagi Zaporijjya AESga yetib keldi. Bu haqdagi ma’lumotni 1 sentabr, payshanba kuni Ukrainaning barcha atom elektr stansiyalari operatori «Energoatom» tasdiqladi

Rossiyaning RIA «Novosti» axborot agentligi missiya mashinalarining atom elektr stansiyasiga kirgani aks etgan videoni e’lon qildi.

«Interfaks-Ukraina» muxbirining ma’lum qilishicha, inspektorlar Ukraina mudofaasi oxirgi chizig‘i va Rossiya kuchlari birinchi qatori boshlanadigan joy o‘rtasidagi «kulrang» zonaga o‘tish chog‘ida rus harbiylari tomonida otishma eshitilgan. Avvalroq missiya ishtirokchilari Novooleksandrivka nazorat punktida harakatlanish imkoniyatini bir necha soat kutishgan. 

Ushbu nazorat punktida missiya yetakchisi, AEXA rahbari Rafael Grossi jurnalistlar bilan suhbatlashdi. Uning ta’kidlashicha, missiya a’zolari hozirgi vaziyatdan, xususan payshanba kuni ertalab kuchaygan harbiy faollikdan xabardor. «Bir necha daqiqa oldin ukrainalik harbiylar meni vaziyatdan xabardor etishdi, yuqori xavflar haqida gapirib berishdi. Ammo barcha ijobiy va salbiy tomonlarni o‘ylab, shu yerga yetib kelganimizni o‘ylab, biz to‘xtamaslikka, harakatlanishda davom etishga qaror qildik, - dedi u. - Biz u tomonga o‘tish uchun minimal shart-sharoitlarga ega ekanligimizga ishonamiz, ammo xavf juda yuqori. Biroq, mening jamoam va men oldimizda juda muhim missiya turganiga ishonamiz».

30 avgust kuni AEXA missiyasi Kiyevga, ertasi kuni esa stansiyadan 55 kilometr uzoqlikda joylashgan, Rossiya tomonidan egallab olingan Zaporijjya shahriga yetib keldi. Zaporijjya oblasti okkupatsion ma’muriyati «rahbari» Yevgeniy Balitskiyning so‘zlariga ko‘ra, AEXA xodimlari ZAES hududida bir kun qoladi, biroq agentlik mutaxassislari uzoqroq qolishga umid qilmoqda. «Agar biz doimiy yoki uzoq muddatli ishtirok etishga muvaffaq bo‘lsak, unda muddatlar uzaytiriladi. Ammo bu birinchi bosqich bir necha kun davom etadi», dedi Grossi jurnalistlarga. 

Mavzuga oid
Top