Qashqadaryo va Jizzax viloyatining tog‘li hududlariga qor yog‘di

Bir necha kundan buyon O‘zbekistonning aksar hududlarida yomg‘ir yog‘ib o‘tmoqda. Respublika hududlariga kirib kelgan g‘arbiy havo oqimlarining ikkinchi bosqichi baland tog‘larga qor yog‘ishiga olib kelgan.

Ijtimoiy tarmoqlarda 2022 yil 18 oktyabrdan 19 oktyabrga o‘tar tunda Qashqadaryo viloyati Shahrisabz tumani, Jizzax viloyati Zomin hamda Baxmal tumanlarida qor yog‘gani aytilgan xabarlar tarqaldi.

Ma’lum bo‘lishicha, ayni damda Qashqadaryo, Samarqand va Jizzax viloyatlaridagi tog‘larga va tog‘ etaklariga qor tushmoqda. Jumladan, Baxmal tumanining Yo‘ldoshboy, Temirqadam, O‘smat, Mo‘g‘ol va Novqa qishloqlarida laylakqor yog‘ib o‘tayotgani ma’lum qilingan.

Gidrometeorologlar tomonidan bugun, 19 oktyabr kuni tog‘larda qor yog‘ish masshtabi kengayishi, Toshkent va Namangan viloyatlari o‘rtasida joylashgan baland tog‘larda ham qor yog‘ishi mumkinligi aytilmoqda.

Iqlimshunos Erkin Abdulahatov tog‘ aholisini mazkur tabiat hodisasi bog‘dorchilik yo‘nalishida mevalarga biroz zarar yetkazilishiga olib kelishi mumkinligidan ogohlantirgan.