Farg‘onada atlas festivali boshlandi. Hokimlik bunga 2,5 mlrd so‘m ajratgan

Ma’lum bo‘lishicha, festivalda Turkiya, Italiya, Ispaniya, Fransiya, Latviya, AQSh, Malayziya, Hindiston, Xitoy, Qozog‘iston, Qirg‘iziston, Tojikiston, Mo‘g‘uliston, Tailand, Bangladesh, Indoneziya va boshqa mamlakatlardan hunarmandlar, madaniyat arboblari, dizayner va soha mutaxassislari ishtirok etishi rejalashtirilgan.

Tadbir davomida Butunjahon hunarmandlar kengashi qarori bilan Marg‘ilonga “Jahon ipak va ikat hunarmandlari shahri” maqomi beriladi.

Farg‘ona viloyati hokimi Xayrullo Bozorov 20 oktyabr kuni atlas festivalini ochib berdi. “Atlas bayrami” festivali 22 oktyabrga qadar davom etadi, uch kun davomida 10 ga yaqin tadbir o‘tkazilishi rejalashtirilgan.

Festival Farg‘ona viloyati hokimligi, YuNeSKOning O‘zbekistondagi vakolatxonasi, “Hunarmand” uyushmasi, Marg‘ilon shahar hokimligi tomonidan boshqa xalqaro hamkorlar bilan birgalikda tashkil etilmoqda.

Farg‘ona viloyati hokimining 2022 yil 11 oktyabrdagi farmoyishi bilan festivalni yuqori saviyada o‘tkazish bilan bog‘liq xarajatlar uchun viloyat mahalliy budjetining 2022 yil uchun tasdiqlangan zaxira jamg‘armasi hisobidan 439 mln so‘m, viloyat mahalliy budjetining erkin qoldiq mablag‘lari hisobidan 2 mlrd 18 mln so‘m, jami 2 mlrd 457 mln so‘m mablag‘ ajratilgan.

Farmoyishda xarajatlar uchun asos sifatida bosh vazir o‘rinbosari Aziz Abduhakimov tomonidan 2022 yil 3 oktyabrda 31/1-1998-son bilan tasdiqlangan Vazirlar Mahkamasining 2022 yil 3 oktyabrdagi 31/1-1998-sonli dasturi hamda Farg‘ona viloyati hokimligining 2022 yil 15 sentabrdagi 316/01-49-sonli yig‘ilish bayoni keltirilgan.

Atlas festivali uchun ajratilgan qariyb 2,5 mlrd so‘m nimalarga sarflanishi viloyat hokimi Xayrullo Bozorovning 11 oktyabrdagi farmoyishi 2-ilovasida ko‘rsatib o‘tilgan. Unga ko‘ra:

• festival obektlarini yuqori tezlikdagi internet bilan ta’minlash uchun 71,3 mln so‘m “O‘ztelekom” AJga;
• festival asosiy sahnasini bezatish, dekoratsiyalar hamda madaniy tadbirlar o‘tkazish xarajatlari uchun 725 mln so‘m viloyat madaniyat boshqarmasiga;
• festival haqidagi reklama dizaynlarini yaratish va Marg‘ilon ko‘chalariga o‘rnatish xizmatlari uchun 71,7 mln so‘m Marg‘ilon shahar hokimligiga;
• Marg‘ilon tarixi muzeyi binosini ta’mirlash va jihozlash uchun 200 mln so‘m viloyat tarixi va madaniyati davlat muzeyiga;
• markaziy ko‘chalar va xiyobonlardagi qurilish-ta’mirlash va obodonlashtirish ishlari uchun 381,3 mln so‘m Marg‘ilon shahar hokimligiga;
• “Ijodkorlar bog‘i”da qurilish-ta’mirlash va elektr ta’minotini mustahkamlash tizimini yaxshilash uchun 374 mln so‘m Yagona buyurtmachi xizmati injiniring kompaniyasi va Marg‘ilon shahar hokimligiga;
• Said Ahmad Xo‘ja Eshon nomli Milliy hunarmandchilik markazida obodonlashtirish va yoritish tizimini yaxshilash uchun 24,2 mln so‘m Yagona buyurtmachi xizmati injiniring kompaniyasiga;
• “Onalarga ehtirom” nomli Eko bog‘i yoritish tizimini yaxshilash ishlari uchun 28,5 mln so‘m Marg‘ilon shahar hokimligiga ajratilishi belgilangan.

Bundan tashqari:

• festivalning xorijiy ishtirokchilari uchun aviachipta xarajatlariga 400 mln;
• xorijlik va mahalliy ishtirokchilarni ovqatlantirish xarajatlari uchun 331,9 mln;
• festival doirasida o‘tkaziladigan modalar namoyishi, master klass xarajatlari uchun 108,5 mln;
• xorijiy ishtirokchilarning mehmonxona xarajatlari uchun 104 mln;
• gala-konsertdagi mushakbozlik va taklifnomalar xarajatlari uchun 84 mln;
• festival g‘oliblarini taqdirlash xarajatlari uchun 75 mln;
• mahalliy va chet eldan kelgan mehmonlarga zamonaviy avtobuslarni ijaraga olish uchun 61,8 mln;
• festival saytini ishlab chiqish va yuritish uchun 30 mln;
• tadbirda xizmat ko‘rsatuvchi mutaxassis va ko‘ngillilarni maxsus kiyimlar (kepka va futbolka) bilan ta’minlash uchun 3,2 mln so‘m ajratilgan.

Eslatib o‘tamiz, prezident Shavkat Mirziyoyev 6 sentabrdagi selektorda hududlarda yangi maktablar qurilishi mavzusiga to‘xtalib, respublika bo‘yicha 290 ta, birgina Farg‘ona viloyatida 23 ta maktabda yangi o‘quv yili boshlangunga qadar qurilish-ta’mirlash ishlari nihoyasiga yetmaganini tanqid qilgandi.

Davlat rahbari investitsion dastur ijrosi bo‘yicha kamchiliklarga yo‘l qo‘ygan viloyatlarga kelgusi yil maktab qurilishi uchun pul berilmasligi aytgandi.

Shu yil may oyida Farg‘onaga tashrifi chog‘ida Shavkat Mirziyoyev viloyat budjeti yil yakunigacha 1 trln so‘mgacha yetkazilishi, viloyat hokimi Xayrullo Bozorov bu mablag‘ni to‘g‘ri yo‘naltirishi kerakligi, Farg‘onaning yo‘li to‘g‘rilanishi, xalqiga suv yetib borishini ta’kidlagandi.

• O‘tgan yili Shahrisabzda bo‘lib o‘tgan yoshlar festivali uchun viloyat mahalliy budjetidan 1 mlrd 517,8 mln so‘m sarflangani muhokamalarga sabab bo‘lgandi.
• Shu yil 21-25 may kunlari Buxoroda 14 milliard so‘m sarflab, “I Xalqaro zardo‘zlik va zargarlik festivali” uchun o‘tkazilgandi. Xarajatlarning 50 foizi mahalliy budjetdan, 50 foizi respublika budjetidan qoplangan.
• 22 may – 5 iyun kunlari Namanganda bo‘lib o‘tgan Gullar bayrami uchun viloyatdagi turli tashkilotlar zimmasiga yuklatilgan xarajatlarni hisobga olmaganda 1 mlrd so‘m sarflangani, lekin bu ham yetarli bo‘lmay festival xarajatlari uchun 3,5 milliard so‘m qarzdorlik yuzaga kelgani tanqidga uchragandi.