«Qizilqum» atrofidagi shubhalar: «Surxon»ning «qutqarilishi», kulgili gollar va Lazarevichning iqrori

«Bugun «Neftchi» va «Metallurg» haqiqiy erkakcha futbol o‘ynadi, uchinchi klub esa g‘ururi bo‘lsa 5-6 futbolchisini Toshkentda qoldirib kelaverishi kerak, so‘nggi turda yoshlar o‘ynagani yaxshiroq», - deya yozdi PFL bosh direktori Diyor Imomxo‘jayev «Qizilqum»ning chempionlik uchun kurash olib borayotgan «Paxtakor»dan uchralgan 0:6 hisobidagi mag‘lubiyatidan so‘ng.

PFL bosh direktorining «Qizilqum» safidagi bir qator tajribali o‘yinchilarni nazarda tutib, «uchinchi klub g‘ururi bo‘lsa 5-6 futbolchisini Toshkentda qoldirib kelaverishi kerak», deya aytgan fikri faqat Toshkentdagi xatolari uchun emas, ikki tur avval Olmaliqda «Surxon»ga qarshi bahsdagi shubhali mag‘lubiyati uchun ham atalgan bo‘lsa, ajabmas.

So‘nggi ikki safar o‘yinida Olmaliq va Toshkentdagi mag‘lubiyatlardan so‘ng «Qizilqum» bosh murabbiyi Nikola Lazarevich ham jamoasi oldida ojiz qolganini uning matbuot anjumanida yangragan ushbu so‘zlari tasdiqlaydi:

«Futbolchilarning o‘z vazifalari bor, yigitlar tajribali. Ammo bir narsani aytish kerakki, bu jamoani men yig‘maganman. Agar jamoani o‘zim yig‘ganimda boshqa gap edi».

Bu bilan Lazarevichning «Surxon» va «Paxtakor» o‘yinidan keyin qo‘l ostidagi futbolchilarga ishonchi qolmaganini sezish qiyin emas. «Qizilqum» ijrosidagi so‘nggi ikki safardagi o‘yinda aksariyat futbolchilarning shubhali harakati muxlis va mutaxasssislarda bo‘lgani kabi jamoa ichida bo‘lgan xorijlik bosh murabbiyning o‘zida ham shubha uyg‘otgani tabiiy.

Lazarevichning fikrlariga qo‘shilmay iloj yo‘q – «Qizilqum» tarkibini yil boshida u emas, hozirda «Surxon» bosh menejyeri sifatida ishlayotgan Hamidjon Aktamov shakllantirgan. Uzoq yillar «Qizilqum»ni boshqargan mutaxassis taklif etgan ayrim o‘yinchilar aynan uning amaldagi jamoasiga qarshi bahsda kulgili xatolarga yo‘l qo‘ygani turli savollarni tug‘dirishi tabiiy.

Xususan, «Surxon» - «Qizilqum» (2:0) uchrashuvidagi penaltidan keyingi 2-goldagi himoya chizig‘ining bolalarcha xatosi futbol ichidagi har qanday kishida shubha uyg‘otgani aniq.

Yuqoridagi vaziyatda navoiyliklarning uzoq yillik tajribali himoyachilari Sherali Jo‘rayev va Fayzulla Qambarovning harakatlariga izoh bera olishar, ammo mavsum boshida Hamidjon Aktamov tomonidan taklif etilgan 88-raqamli chap qanot himoyachisi Artyom Dmitriyev va 75-raqamli himoyachi Oleg Tolmasovning harakatlarini qanday tushunish mumkin? Rossiyalik o‘yinchilarning Navoiyga taklif etgani uchun Aktamovga rahmatimi bu? «Surxon» aynan ushbu g‘alaba bilan yakunda Superligada qolish vazifasini bajardi.

«Surxon» kelajakda o‘sishi va to‘g‘ri yo‘ldan borishi uchun klub loyihasi haqida jiddiy bosh qotirish shart. Futboldan nimadir oladigan va uni loyqalashtiradigan insonlar emas, unga nimadir bera oladigan kishilar juda muhim. Maqsadga shunday kishilar bilan erishish rejada bor bo‘lsa, qing‘ir ishning qiyig‘i 40 yilda ham chiqadi», - deya yozadi Diyor Imomxo‘jayev Termiz klubi ligada qolish vazifasini bajargach.

Umuman olganda, mavsum yakunida «Qizilqum» bilan shartnomasi yakuniga yetadigan Oleg Tolmasovning so‘nggi turda ham «Paxtakor»ga qarshi muhim o‘yinning dastlabki uchta golida Dragan Cheranga shunchaki «sovg‘a» ulashgani rossiyalik himoyachiga nisbatan turli shubhalarni asoslantiradi. Ko‘ring va zavqlaning:

«Qizilqum» bosh murabbiyi Tolmasovning 3-goldagi vaziyatda maydonga qulaganidan keyin 57-daqiqada uni maydondan olishga qaror qildi. Ammo bu kulgili gollar kamayishiga sabab bo‘lgani yo‘q.

Toshkentdagi sharmandali mag‘lubiyatdan keyin Nikola Lazarevich «Surxon» bilan o‘yindan keyin allaqachon iste’foga chiqishga qaror qilgani, mavsum yakunigacha chidab turganiga shama qildi.

«Surxon» bilan o‘yindan so‘ng iste’fo berishimni ta’kidladim. Ketishni istadim. Ammo mavsum oxirigacha qoldim. «So‘g‘diyona» bilan o‘yin men uchun «Qizilqum»dagi oxirgisi bo‘ladi. So‘nggi o‘yinda hammasi yigitlarning o‘ziga bog‘liq. Ular o‘z vazifalarini bajarishni istasa, oxirgi turga har tomonlama tayyorlana olishadi. «Navbahor», «Metallurg»ga qarshi o‘yinlardan so‘ng ketishni istagandim. «Surxon» bilan uchrashuvdan keyin esa qarorim yuz foiz aniq edi. Faoliyatimda yangi chaqiruv va restart zarur», - deya fikr bildirgan Lazarevich.

Moliyaviy jihatdan yuqori o‘rinlar uchun da’vogarlik qilishga kuchi yetadigan «Qizilqum» oxirgi mag‘lubiyatlaridan keyin OChL yo‘llanmasi uchun kurashdan chiqdi, jamoa so‘nggi turda ham o‘ziga kela olmasa turnir jadvalida 7-pog‘onaga tushib ketishi ham hech gap emas. Mavsum yakunida klubda o‘zgarishlar qilinishiga shubha yo‘q, chunki baquvvat homiyga ega Navoiy klubi yuqori o‘rinlarga munosib. Ammo joriy mavsum yakunidagi xunuk holatlar shunchaki javobsiz qolishi bu jamoa ishqibozlari va Superligani kuzatib borgan oddiy muxlislarga nisbatan adolatdan bo‘lmaydi.

Said Usmon