Polshadagi qishloqqa raketa qulashi. Hozirgacha nimalar ma’lum?

Agentlik suhbatdoshlari fikricha, ukrain harbiylari katta ehtimol bilan uni Polsha-Ukraina chegarasida joylashgan energetika infratuzilmasi tomon uchib kelayotgan rossiyaliklar raketasini urib tushirish uchun uchirgan.

Avvalroq raketa Rossiyadan uchirilgani haqidagi versiyani Balidagi G20 sammitida ishtirok etayotgan G7 va NATO yetakchilarining shoshilinch yig‘ilishini chaqirgan AQSh prezidenti Jo Bayden ham shubha ostiga olgandi.

«Tergov ishlari to‘liq yakunlangunicha men bu haqda gapirishni istamasdim, ammo trayektoriyadan kelib chiqqan holda bu raketa Rossiyadan uchirilgani ehtimoli kam, ammo biz yana tekshirib ko‘ramiz», degan u uchrashuvdan keyin jurnalistlarga.

CNN telekompaniyasi NATOning shaxsini sir saqlashni so‘ragan harbiy amaldoriga asoslangan holda alyans harbiylari Polshada portlagan raketa yo‘nalishini kuzatishga muvaffaq bo‘lishganini xabar qilishgan. Uning ma’lumotiga ko‘ra, NATO razvedkachi samolyoti Polsha havo hududida missiyasini amalga oshirish chog‘ida ushbu raketa parvozini qayd etgan.

Manba bu raketani kim uchirganiga aniqlik kiritmagan, faqat yig‘ilgan ma’lumotlar, jumladan radarda qayd etilgan raketa izlari NATO davlatlari va Polsha hukumatiga uzatilganini ta’kidlagan. 

Keyinroq Reuters Bayden NATO va G7 yetakchilarini Polshadagi portlash ukrainlarning havo hujumidan mudofaa tizimi raketasi tufayli sodir bo‘lgani haqida xabardor qilganini xabar qildi.

Raketa Polsha hududiga 15 noyabr kuni mahalliy vaqt bilan soat 15:40 da, rossiyalik harbiylar Kiyev va Ukrainaning boshqa shaharlarining o‘qqa tutayotgan chog‘da qulagan. Raketa g‘alla saqlash omboriga tushgan va ikki kishi halok bo‘lgan.

Hodisa ro‘y bergan Pshevoduv qishlog‘i Ukraina chegaralaridan besh kilometr masofada joylashgan.

Ukraina prezidenti devonidagilar Polshaga raketa qulashi uchun javobgarlikni Rossiya zimmasiga yuklagandi. Ushbu hodisa bo‘yicha munosabat bildirgan Volodimir Zelenskiy «terror Ukraina davlat chegaralari bilan cheklanmasligi»ni aytgandi: «Rossiya raketalari Polsha bo‘ylab zarba berdi. Ukraina terrorchi-davlat bizning mamlakat bilan cheklanmasligi haqida necha bor aytgandi? Rossiya terrori davom etarkan, bu vaqt masalasi bo‘lib qoladi. Rossiya jazosizlikni qanchalik uzoq his qilsa, uning raketalari uchib yetib borishi mumkin bo‘lgan barchaga tahdid solaveradi. NATO hududiga raketa zarbasii berish — bu Rossiyaning kollektiv xavfsizlik tomon berilgan raketa zarbasi. Bu mojaroning jiddiy kengayishi. Bunga qarshi harakatni boshlash kerak».

Rossiya mudofaa vazirligi shu kuni Ukraina-Polsha chegarasidagi nishonlarga zarbalar bermagani, mahalliy nashrlarda tarqalgan tasvirlarning Rossiya raketalariga aloqasi yo‘qligini ma’lum qildi. Polshaga rossiyaliklar raketasi tushgan bo‘lishi mumkinligi haqidagi xabarlar Rossiya mudofaa vazirligi tomonidan «vaziyatni keskinlashtirish maqsadida qasddan uyushtirilgan provokatsiya» deb baholandi.

Turkiya prezidenti Rajab Toyyib Erdo‘g‘an ham Rossiyani raketa qulashi bilan bog‘liq hodisaga aloqador emas deb topdi. «Men bu ularning raketasi emasligini aytgan Rossiyaning pozitsiyasini hurmat qilishim kerak. Bu biz uchun muhim», — degan Erdo‘g‘an Balidagi G20 sammitidan keyin o‘tkazilgan matbuot anjumanida.