16:07 / 18.11.2022
3607
Европа Иттифоқи Россиянинг қарийб 68 миллиард евролик активларини музлатиб қўйди

ЕИ томонидан музлатилган барча Россия активларининг 90 фоизи Бельгия, Люксембург, Италия, Германия, Ирландия, Австрия ва Францияда.

Фото: AP

Европа Иттифоқи Россиянинг қарийб 68 миллиард евролик активларини музлатиб қўйди. Бу ҳақда 18 ноябрь, жума куни Европа комиссиясининг тегишли ички ҳужжати билан танишиб чиққан Американинг Politico нашри хабар берди.

Журналистларнинг маълумотларига кўра, музлатилган маблағларнинг қарийб 50 миллиард евроси Бельгияда, яна 5,5 миллиарди Люксембургда. Италия, Германия, Ирландия, Австрия ва Франция билан биргаликда музлатилган активларнинг 90 фоиздан ортиғи ушбу давлатлар ҳиссасига тўғри келади. 

Украинадаги тажовуз учун Европа Иттифоқи санкциялари натижасида музлатилган Россия миллий захиралари ҳажми тахминий равишда 33,8 миллиард еврога баҳоланмоқда.

Еврокомиссия, бундан ташқари, яқин келажакда ЕИ кенгаши санкциялардан қочишни жиноят деб тан олишини кутмоқда, дея хабар беради Politico. Бу айблов хулосаси чиқарилган тақдирда мол-мулкни мусодара қилиш тартибини осонлаштиради. Бу билан боғлиқ қийинчиликлар, хусусан, Полшада пайдо бўляпти. Унинг вакили Варшава Европа Иттифоқи ташаббусини тўлиқ қўллаб-қувватлашини, аммо уни амалга ошириш учун тегишли миллий қонун қабул қилиш зарурлигини тушунтирди.

Европа Иттифоқининг янгиланган санкциялар рўйхатига ҳозирда 1241 жисмоний ва 118 юридик шахс киритилган – улар Украина ҳудудий яхлитлиги ва суверенитетига путур етказишда иштирок этган деб ҳисобланади. Жазо чоралари рўйхатига активларни музлатиш ва Европа Иттифоқига киришни тақиқлаш киради. 

Top