O‘zbekiston va Qozog‘iston chegara demarkatsiyasi bo‘yicha kelishuv loyihasini tayyorladi

O‘zbekiston va Qozog‘iston davlat chegarasini demarkatsiya qilish to‘g‘risidagi bitimni imzolaydi.

Bu haqda Qozog‘iston Tashqi ishlar vazirligi rasmiy vakili Aybek Smadiyarov brifingda ma’lum qildi.

Toshkentda O‘zbekiston va Qozog‘iston hukumat delegatsiyalarining uchrashuvi bo‘lib o‘tdi.

«Tomonlar Qozog‘iston va O‘zbekiston o‘rtasida Qozog‘iston-O‘zbekiston davlat chegarasini demarkatsiya qilish to‘g‘risidagi bitim loyihasini hamda yuqoridagi bitimga ilova bo‘lgan chegarani demarkatsiya qilish bo‘yicha yakuniy hujjatlar loyihalarini imzolashga tayyorladilar», — dedi Qozog‘iston Tashqi ishlar vazirligi rasmiy vakili Aybek Smadiyarov. 

U muzokaralar do‘stlik va o‘zaro hamjihatlik muhitida o‘tganini ta’kidladi.

20 oktyabr kuni Qozog‘iston va O‘zbekiston o‘rtasida qozoq-o‘zbek davlat chegarasini demarkatsiya qilish bo‘yicha kelishuv loyihasi tayyorlandi. Davlat chegarasining demarkatsiyalangan chizig‘ining uzunligi 2 356,666 kmni tashkil qiladi.