Zelenskiy Yevromaydan qurbonlarini xotirladi, Donbassda janglar davom etmoqda. Urush suratlari

Rossiya qo‘shini Xerson va unga qo‘shni Antonovka posyolkasini o‘qqa tutdi, Xersonda bir kishi halok bo‘ldi. Bundan tashqari, Xersonda rossiyaliklarning navbatdagi qiynoq kameralari topildi — bugungi kungacha bunday joylardan to‘rttasi aniqlangan. The New York Times jurnalistlari Ukraina qurolli kuchlari rossiyalik harbiy asirlarni o‘ldirgani aks etgan video haqiqiyligini tasdiqladi, bu video 19 noyabr kuni ijtimoiy tarmoqda paydo bo‘lgandi. Vladimir Putin Ukrainadagi urushdagi ko‘ngillilar uchun harbiy harakatlar faxriysi maqomi to‘g‘risidagi qonunni imzoladi. «Sota» nashri ma’lumotiga ko‘ra, RF armiyasi Donetsk oblasti Pavlovka qishlog‘i uchun janglarda katta yo‘qotishlarga uchragan: safarbar qilinganlardan birining qarindoshi, uning yaqini xizmat qilgan bo‘linmada 120 kishidan janglarda faqat 19 kishi omon qilganini aytgan.

Quyida 21 noyabr, urushning 271-kunida Ukrainaning turli hududlarida olingan suratlar.

Yevromaydan boshlanganining 9 yilligi

Ukraina prezidenti Volodimir Zelenskiy va uning rafiqasi Yelena Zelenskaya Kiyevdagi «Nebesnoy sotne» (Samoviy yuzlik) yodgorligida — 2014 yil dekabridan 2014 yil fevraliga qadar davom etgan Yevromaydan voqealari qurbonlarini shunday atashadi. Ukraina va Yevroittifoq o‘rtasidagi integratsiya bo‘yicha kelishuvni imzolash ukrain hukumati tomonidan to‘xtatilgach, 2013 yil 21 noyabrida ommaviy norozilik aksiyalari boshlangan. Yevromaydan voqealarida 2442 kishi jabrlangan. Namoyishlar yakunlariga ko‘ra, muddatdan oldingi saylovlar o‘tkazilgan va unda Petro Poroshenko g‘alaba qozongan. Bir yil o‘tib Poroshenko 21 noyabrni Qadr-qimmat va ozodlik kuni deb e’lon qiladi.
Ukraina prezidenti matbuot xizmati / Reuters / Scanpix / LETA

Ukrain harbiysi Kiyevdagi «Nebesnoy sotne» yodgorligiga sham qo‘ymoqda. Yodgorlik Ukrainadagi ozodlik ramzlaridan biri bo‘lgan kazaklar xochi shaklida ishlangan. Foto: Andrew Kravchenko / AP / Scanpix / LETA

Donbass shimolidagi janglar

Rossiya qo‘shini yurishi davom etayotgan Donbassdagi front chizig‘ida BM-21 «Grad» baravar o‘t ochish reaktiv tizimi kuzovida ketayotgan ukrain harbiylari. RF mudofaa vazirligi rossiyaliklar Ukraina qurolli kuchlarining hujumlarini muvaffaqiyat bilan qaytarayotgani haqida xabar qilgan. Ammo Primoredan safarbar qilinganlardan birining qarindoshi «Sota» nashriga Donetsk oblasti Pavlovka qishlog‘i atrofida uning bo‘linmasi katta yo‘qotishlarga uchragani haqida aytgan. Uning tasdiqlashicha, bo‘linmadagi 120 kishidan faqat 19 kishi omon qolgan. Pavlovka Donetskdan 130 kilometr masofada joylashgan, Ukraina prezidenti devoni maslahatchisi Aleksey Arestovichning tasdiqlashicha, hududning «yarmi» Ukraina qurolli kuchlari tomonidan nazorat qilinmoqda. Rossiya tomoni esa qishloq to‘liq nazorat ostiga olinganini aytadi.
Laurel Chor / SOPA Images / ZUMA Press Wire / Scanpix / LETA

Ukrain harbiysi front chizig‘i yaqinidagi pozitsiyada dron uchirmoqda.
Anatolii Stepanov / AFP / Scanpix / LETA

Britanlarning Ukraina armiyasiga berilgan FV103 Spartan rusumli zirhli transportyori oktyabr oyidan ukrainlar nazoratiga qaytgan Ternida harakatlanmoqda. Terni iyul oyida rossiyaliklar egallab olgan Severodonetskdan 50 kilometr shimoli-sharqda joylashgan.
Libkos / AP / Scanpix / LETA

Ternida qolgan rossiyalik harbiy jasadi. Rossiya harbiylari bu qishloqqa 30 mart kuni kirishgan va besh oy mobaynida istilo qilishgan.
Libkos / AP / Scanpix / LETA

Ternida rossiyaliklardan o‘lja qilib olingan «Tigr» rusumli zirhli avtomobilda harakatlanayotgan ukrain harbiysi
Libkos / AP / Scanpix / LETA

Rossiyaliklarning Makeyevkadagi yonilg‘i omboriga zarbasi

21 noyabr kuni tunda Donetsk oblastining Makeyevka shahrida (Rossiya nazorati ostida) yirik yong‘in ro‘y berdi. Temiryo‘l bekati yaqinidagi yonilg‘i to‘ldirilgan ikki sisterna va uchta statsionar yonib ketgan. «DXR» FVVga ko‘ra, yong‘in «portlash xavfi bo‘lgan predmet» kelib urilishidan chiqqan. Keyinroq Ukraina armiyasi Makeyevkadagi boshqaruv punkti va yonilg‘i omboriga zarbalar berilganini tasdiqladi.
Alexander Ermochenko / Reuters / Scanpix / LETA

Makeyevkada yonilg‘i sisternasidagi olovni o‘chirayotgan o‘t o‘chiruvchi. Luhansk oblastida shu nomdagi qishloq ham bor, bu joy shu kunlarda rossiyaliklar harbiy asirlarni o‘ldirgani qayd etilgan video tarqalgach, mashhur bo‘ldi. Ukraina hodisa yuzasidan tekshiruv o‘tkazishni va’da qilgan, The New York Times nashri esa tarqalgan videoyozuv haqqoniyligini tasdiqladi.
Alexander Ermochenko / Reuters / Scanpix / LETA

Qorong‘ilikda ishlayotgan xersonlik shifokorlar

11 noyabr kuni ozod etilgan Xersondagi tez yordam stansiyasidagi paramediklar. Shaharda elektr va ichimlik suvi ta’minotida muammolar kuzatilmoqda, shu tufayli shifokorlar qorong‘ilikda ishlashga majbur bo‘lmoqda.
Roman Hrytsyna / AP / Scanpix / LETA

Shifokor jigarida sirrozi bor bemorning ko‘rsatkichlarini ko‘zdan kechirmoqda
Roman Hrytsyna / AP / Scanpix / LETA

Xersondan ilk evakuatsiya poyezdi

19 noyabr kuni, Xerson ozod etilganidan qariyb bir hafta o‘tganida, vaqtincha bosib olingan hududlarni reintegratsiya qilish masalalari bo‘yicha vazir Irina Vereshchuk brifing chog‘ida oblast aholisining ko‘ngilli evakuatsiyasi boshlanishi haqida e’lon qildi. U evakuatsiya uchun qilinadigan xarajatlar davlat tomonidan qoplanishiga va’da berdi. Buning sababi — istilo vaqtida infratuzilmalar vayron qilingani va elektr hamda ichimlik suvi ta’minotiga yuklamalarni haddan tashqari oshiruvchi qish kelayotgani. Shuningdek, ukrain rasmiylari Xerson oblastidan ketganlarni hozircha uyga qaytmaslikka chaqirgan. 21 noyabr kuni Xersondan Mikolayivga ilk evakuatsiya poyezdi jo‘nab ketdi, bu yerdan odamlar Ukrainaning boshqa regionlariga tarqatiladi.