Ukraina prezidenti Zelenskiy jahon hamjamiyatini Rossiya tomonidan «terror va qotillikka» qat’iy javob berishga chaqirdi. U BMT Xavfsizlik kengashidan «energetik terrorizm»ning barcha shakllarini qoralashni so‘radi.
Ukraina prezidenti Volodimir Zelenskiy Rossiyaning Ukraina energiya tarmoqlariga zarba berishini insoniyatga qarshi jinoyat deb atadi. 23 noyabr, chorshanba oqshomida BMT Xavfsizlik kengashining navbatdan tashqari yig‘ilishi ishtirokchilariga videomurojaati chog‘ida u: «harorat noldan past bo‘lib, millionlab odamlar energiya ta’minotidan mahrum bo‘lganida, bu insoniyatga qarshi ochiq jinoyatdir», dedi.
Avvalroq Zelenskiy Moskvani Ukraina tomonidan amalga oshirilgan navbatdagi yirik raketa hujumi munosabati bilan terror va qotillikda ayblab, Ukrainaning BMTdagi elchisiga jahon tashkiloti Xavfsizlik kengashining navbatdan tashqari yig‘ilishini o‘tkazishni so‘rashni topshirgandi. «Tinch aholining o‘ldirilishi, fuqarolik infratuzilmasining vayron bo‘lishi - bular teraktlar. Jahon hamjamiyati bunga qat’iy javob berishi kerak», - deya ta’kidladi u.
Rossiya BMT Xavfsizlik kengashining doimiy a’zosi sifatida veto qo‘yish huquqiga ega va jahon tashkiloti boshqaruv organining Ukraina bilan urush bo‘yicha har qanday rezolyutsiyasini bloklashi mumkin. Zelenskiy Xavfsizlik kengashini «xalqaro terrorchi (davlat)ning o‘zini garovga olishiga» yo‘l qo‘ymaslikka chaqirdi.
O‘z navbatida, Rossiyaning BMTdagi doimiy vakili Vasiliy Nebenzya Ukrainadagi infratuzilma obektlariga zarba berishni «bu davlatni G‘arb qurollari bilan ta’minlangani va Kiyevning Rossiya ustidan harbiy g‘alaba qozonish haqidagi o‘ylanmagan chaqiriqlariga» javob deb atadi. Nebenzyaning aytishicha, Kiyev «realistik pozitsiya»ni egallab, muzokaralar stoliga qaytmaguncha, Rossiya kuchlari zarba berishda davom etadi. Shu bilan birga, doimiy vakil fuqarolik infratuzilmasiga berilgan zarbalar Ukraina Qurolli kuchlarining jangovar qobiliyatiga qanday ta’sir qilishiga aniqlik kiritmadi.
Rossiya oktabr oyi boshidan beri Ukrainaning energetika infratuzilmasiga kuchli zarbalar bermoqda. Oxirgi bunday hujum 23 noyabr kuni sodir bo‘ldi. Zelenskiyning so‘zlariga ko‘ra, Rossiya 67 ta raketa uchirdi, buning natijasida Kiyev, Odessa va Chernigov viloyatlari quvvatsizlangan. Barcha atom elektr stansiyalari va aksariyat GESlar vaqtinchalik o‘chirilgan. Ukrainaning ko‘plab hududlarida suv ta’minoti va isitish bilan bog‘liq jiddiy muammolar mavjud.
