08:51 / 26.11.2022
9722

Qozog‘istonda prokuror talabi bilan JSST sayti bloklandi

Qozog‘istonda prokuratura talabi bilan JSSTning rasmiy sayti bloklandi. Bu haqda faqat bir yarim oydan keyin ma’lum bo‘ldi.

Foto: Sean Gallup / Getty Images

Qozog‘istonlik shifokorlar ijtimoiy tarmoqlarda g‘alati holatga e’tibor qaratishdi – Qozog‘istonda bir oydan ortiq vaqt davomida Jahon sog‘liqni saqlash tashkilotining rasmiy saytiga kirish imkoni bo‘lmayapti. Qozog‘iston ommaviy axborot vositalarining 25 noyabr, juma kuni xabar berishicha, Olmaota viloyati Talgar tuman sudi qarori bilan JSST sayti bloklangan. Bundan tashqari, sud qarori 2022 yil 15 oktyabrda qonuniy kuchga kirgan.

Sud qaroriga Olmaota viloyati Talgar tumani prokurori nomidan «xorijiy ommaviy axborot vositalarida joylashtirilgan mahsulotlarni» noqonuniy deb e’lon qilish va Qozog‘iston Respublikasi hududida uning tarqatilishini to‘xtatib turish talabi bo‘lgan «davlat manfaatlari yo‘lidagi» arizasi sabab bo‘lgan. Prokuratura ma’lumotlariga ko‘ra, noqonuniy «mahsulotlar» o‘z joniga qasd qilish usullari va tavsiyalari haqidagi ma’lumotlar bo‘lib, ular internetdagi bir qancha manbalarda, jumladan, JSST rasmiy saytining bo‘limlaridan birida joylashtirilgan.

Olmaota viloyati Talgar tumani sudi matbuot xizmati xabariga ko‘ra, prokuratura tomonidan taqdim etilgan ma’lumotlar to‘liq tasdiqlangan. «Fuqarolar, jumladan, foydalanuvchilari voyaga yetmagan bolalar va yoshlar bo‘lgan internet tarmog‘idan hamma foydalanishi mumkinligi hisobga olinsa, bu ma’lumotlar noqulay ijtimoiy vaziyatni shakllantirishda xavflidir», — deyiladi ijtimoiy tarmoqlar orqali tarqatilgan matbuot xizmati xabarida. Shuning uchun prokurorning arizasi «qondirilgan».

Shu bilan birga, JSSTning rasmiy veb-saytiga VPN tarmoqlari yordamida osongina kirish mumkin. Ammo, Olmaota viloyati Talgar tumani prokurorining g‘azabiga sabab bo‘lgan sahifa hozirda yo‘q. Ta’kidlanishicha, 2020 yilda veb-kontent yangi platformaga ko‘chirilganligi sababli, eski kontent ochilmayotgan bo‘lishi mumkin.

Qozog‘iston Sog‘liqni saqlash vazirligining Xalqaro hamkorlik departamenti JSST rasmiy veb-sayti bloklanganidan xabardor ekanliklarini va hozirda «tegishli davlat idoralari va tuzilmalari bilan ish olib borayotganini» ma’lum qildi.

Mavzuga oid
Top