Ko‘kdaladagi qishloq tug‘uruqxonasida elektr ta’minoti tiklangan

Qishloq tug‘uruqxonasida bo‘lgan ayollarning asosiy qismiga uyiga javob berilgan. Muassasa issiqlik ta’minotida uzilish bo‘lgani haqidagi ma’lumot rad etildi.

Foto: Videodan kadr

SSV matbuot xizmati Qashqadaryo viloyati Ko‘kdala tumanidagi tug‘uruqxonada tok o‘chib qolgani bilan bog‘liq xabarlar yuzasidan ma’lumot berdi.

Mazkur holat viloyat sog‘liqni saqlash boshqarmasi mas’ullari tomonidan o‘rganilgan.

«Ko‘kdala tumani tibbiyot birlashmasiga qarashli Chiyali bo‘linmasi, ya’ni qishloq uchastka shifoxonasida 2022 yil 11 dekabr kuni soat 03:30 da elektr energiyasida uzilish kuzatilgan. Ammo issiqlik ta’minotida uzilish bo‘lmagan.

Shifoxonada 4 kun avval jami 7 nafar ayol farzandli bo‘lgan, 11 dekabr soat 12:00 da ularning 6 nafariga uyga javob berilgan. 1 nafar ayol chaqalog‘i bilan Ko‘kdala tumani tibbiyot birlashmasi shifoxonasiga ko‘chirilgan. Hozirda ona va bolalarning salomatligi yaxshi, shifokorlar nazoratiga olingan», deyiladi vazirlik xabarida.

Ayni paytda shifoxonada elektr ta’minoti tiklangan. Muassasa qo‘shimcha elektr generatori bilan ta’minlangan.