Belgiya va Fransiyada Marokash bilan o‘yindan keyin tartibsizliklar yuz berdi

Bryusselda 15 dekabr, payshanbaga o‘tar kechasi futbol ishqibozlari Qatarda bo‘lib o‘tayotgan jahon chempionatida Fransiya va Marokash o‘rtasidagi yarimfinal uchrashuvidan so‘ng tartibsizliklar keltirib chiqardi. Politsiya 100 ga yaqin odamni tinchlikni buzgani, ikkita politsiya mashinasiga zarar yetkazgani va taqiqlangan pirotexnika buyumlari olib yurgani uchun qo‘lga oldi. Belgiya poytaxtining ayrim markaziy hududlarida ehtiyot chorasi sifatida transport harakati to‘sib qo‘yildi.

Huquq-tartibot idoralari xodimlari bilan to‘qnashuvlar Antverpenda ham sodir bo‘ldi, deya xabar beradi dpa agentligi. Politsiya ham u yerda ayrim shaxslarni qo‘lga olgan. 

Fransiyada o‘z jamoasining jahon chempionatidagi muvaffaqiyati munosabati bilan muxlislarning xursandchiligi ayrim hollarda nazoratdan chiqib ketdi. Parijdagi Yelisey maydonida muxlislar va politsiya o‘rtasida qisqa muddatli to‘qnashuvlar bo‘lib o‘tdi. Mamlakat janubidagi Monpele shahrida har ikki jamoa muxlislari bir-birlariga petarda uloqtirdi. Kannda bir nechta mashinaga zarar yetkazildi va politsiya ko‘zdan yosh oqizuvchi gaz ishlatdi, deb xabar berdi mintaqaviy Nice-Matin gazetasi. 

Shu bilan birga, o‘yindan keyin Berlinda vaziyat tinch, deya ta’kidlaydi dpa. Politsiya ma’lumotlariga ko‘ra, muxlislarning aksariyati o‘yin tugaganidan ko‘p o‘tmay uylariga ketishgan. Noykyoln tumanida muxlislar kichik feyyerverk uyushtirdi. 

Bundan bir necha soat avval Fransiya milliy jamoasi – futbol bo‘yicha amaldagi jahon chempioni – yarimfinalda Marokash jamoasini mag‘lub etib, Qatardagi jahon chempionati finaliga yo‘l oldi – 2:0. JCh-2022ning hal qiluvchi bahsida fransuzlar 18 dekabr kuni Argentina milliy jamoasi bilan to‘qnash keladi.