NATO bosh kotibi: Putin Ukrainada uzoq davom etadigan urushni rejalashtiryapti

Kreml Ukrainada uzoq davom etadigan urushga hozirlik ko‘rmoqda, shuning uchun bu mamlakatni qo‘llab-quvvatlayotgan barcha NATO davlatlari Rossiya prezidenti Vladimir Putin «jang maydonida g‘alaba qozona olmasligini» tushunmaguncha, Kiyevga qurol yetkazib berishda davom etishi kerak. Bu haqda 16 dekabr, juma kuni AFP agentligiga bergan intervyusida alyans bosh kotibi Yyens Stoltenberg ma’lum qildi. 

Uning so‘zlariga ko‘ra, Putin Ukraina ustidan nazoratni qo‘lga kiritish maqsadidan voz kechgani haqida hozircha hech qanday alomat yo‘q. «Rossiyani past baholamaslik kerak. Rossiya uzoq urushni rejalashtirmoqda», - deya ogohlantirdi Stoltenberg. «Biz ular ko‘proq kuchlarni safarbar qilayotganini, katta yo‘qotishlarga tayyor ekanini, ko‘proq qurol va o‘q-dorilarga ega bo‘lishga harakat qilayotganini ko‘ryapmiz. Prezident Putin bu urushda uzoq vaqt qolishga va yangi hujumlarni boshlashga tayyor ekanini tushunishimiz kerak», deya qo‘shimcha qildi u. 

Shu bilan birga, NATO bosh kotibi fikricha, bu urush «ko‘p urushlar kabi muzokaralar stolida tugashi» mumkin, ammo yakunda har qanday qaror «Ukrainaning suveren, mustaqil davlat sifatida g‘alabasini ta’minlashi kerak». «Bunga erishishning eng tezkor yo‘li – prezident Putin jang maydonida g‘alaba qozona olmasligini, balki o‘tirib, vijdonan muzokaralar olib borishi kerakligini tushunishi uchun ukrainaliklarga harbiy yordam ko‘rsatishdir», - dedi Yyens Stoltenberg.

Uning qayd etishicha, ittifoqchilar Ukrainaga Patriot zenit-raketa komplekslarini (ZRK) yetkazib berish bo‘yicha muzokaralar olib bormoqda. Biroq, Stoltenbergning so‘zlariga ko‘ra, hozirgi muhim masala - allaqachon yetkazib berilgan qurollar ish holatida qolishi. Shuning uchun NATO o‘z zaxiralarini to‘ldirish uchun ham, Kiyevga yangi qurol-yarog‘ yetkazib berish uchun ham qurol ishlab chiqarishni oshirmoqda, dedi u.