Sog‘liqni saqlash vazirligining Onalik va bolalikni muhofaza qilish boshqarmasi boshlig‘i Sevara Ubaydullayeva maxsus brifing chog‘ida bu borada ma’lumot va savollarga javob berdi:
“Samarqand viloyatida kuzatilgan holat bo‘yicha 7 nafar tibbiyot mutasaddilari o‘z lavozimidan olingani rost. SSV tomonidan ishchi guruh tashkil etildi va Samarqandda chuqur tahliliy o‘rganish o‘tkazildi. O‘rganish davomida bu xodimlar tomonidan qator kamchiliklarga yo‘l qo‘yilgani aniqlandi va shu sabab xodimlar ishdan bo‘shatildi. Ishchi guruh xulosasi huquqni muhofaza qilish organlariga taqdim etildi.
Ta’kidlash joiz, hududiy sog‘liqni boshqarmasiga bu holat (bolalar o‘limi) to‘g‘risidagi ma’lumot juda kech kiritilgan. Shu sabab qonunchilikda ko‘rsatilgan tegishli choralar ko‘rildi. Hozir o‘rganish ishlari davom ettirilmoqda. Bu haqda qo‘shimcha ma’lumot berib boramiz”, – dedi Sevara Ubaydullayeva.
Eslatib o‘tamiz, Hindistonning “Marion Biotech” kompaniyasi O‘zbekistonda bolalar o‘limiga sabab bo‘lgan “Dok-1 Maks” siropini ishlab chiqarishni to‘xtatgan. Hindiston hukumati bu borada surishtiruv boshlagan va tez orada hisobot beriladi.
