Jon va Frensis – Britaniyaning oddiy fuqarolari. Ular turmush qurishga ahdlashib, to‘y uchun barcha tayyorgarlikni ko‘rib bo‘lishgach, hazil tariqasida qirolicha Yelizaveta II ga maktub yo‘llab, to‘yga taklif etishadi.
2012 yilda bo‘lib o‘tgan bu to‘y ko‘pchilik britaniyaliklarning yodida qolgan. Jon va Frensis Manchester Siti zalida nikoh to‘ylarini o‘tkazishni rejalashtirib qo‘yishadi. Aynan o‘sha kuni shu binoga qo‘shni zalda qirolicha Yelizaveta II ham qandaydir marosimda ishtirok etishi kerak edi. Bundan xabar topgan juftlik hazil tariqasida qirolicha saroyiga to‘yga taklifnoma yuborishdi. Ular ushbu maktublarining qirolichaga yetib bormasligiga ishonchlari komil bo‘lgan o‘sha kunlarda javob maktubini olishadi. Yelizaveta taklifnoma uchun minnatdorchilik bildirib, ularni hayratda qoldiradi. Ammo sarguzashtlar shu yerda nihoyasiga yetmaydi.
Nihoyat, uzoq kutilgan to‘y kuni ham yetib keldi. Kichik marosimlar zalida kelin va kuyovning ixchamgina baxt kechasi o‘tkazilayotgan bir paytda qo‘shni binoda qirolicha Yelizaveta II va Edinburg hersogi ishtirokida 200 nafar mahalliy ko‘ngillilar bilan kechki ovqat bo‘lib o‘tayotgan edi. Qirolicha to‘satdan yig‘ilganlardan qo‘shni zalda o‘tkazilayotgan to‘yda qatnashish uchun ruxsat so‘raydi va kutilmaganda shahzoda Filipp bilan birgalikda juftlikni tabriklash uchun kirib keladi.
Bu paytda nafaqat kelin-kuyov, balki ularni tabriklash uchun yig‘ilgan 40 ga yaqin mehmonlar ham hayratdan qotib qolishadi.
Qirollik oilasining ashaddiy muxlisi bo‘lgan 48 yoshli kuyov Jon ushbu tashrifni “to‘y tortining kremi” deb ta’riflaydi. Uning ta’kidlashicha: “Qirolicha kelin bo‘lmish Frensisning ko‘ylagi juda ham bejirim ekanligini ta’kidlab, bizga ulkan baxtlar tiladi. Edinburg hersogi esa asal oyini qayerda o‘tkazmoqchi ekanligimizni va bu bizlar uchun sovg‘a bo‘lishini aytdi. Biz bu tashrifni, hatto, orzu ham qilmagan edik”.
Ushbu kun qirollik oilasi uchun kechki ovqatdan tashqari ikki shaharda joylashgan to‘rtta shifoxona hamda BBC shtab-kvartirasiga tashrif buyurilishi kerak bo‘lgan gavjum kun bo‘lgan bo‘lsa-da, ular o‘z jadvallaridan juftlikni tabriklash uchun vaqt ajratishgan edi.
