AQSh: Prigojin Baxmut yaqinidagi konlarga qiziqyapti

AQSh ma’muriyatining fikricha, Rossiya prezidenti Vladimir Putinga yaqin bo‘lgan "Vagner" XHK asoschisi Yevgeniy Prigojin Baxmut shahri yaqinidagi tuz va gips konlarini o‘z nazoratiga olmoqchi, shahar uchun esa shiddatli janglar davom etmoqda. Bu haqda 5 yanvar, payshanba kuni Oq uy vakiliga tayanib, Reuters agentligi xabar berdi.

Vashingtonda «Baxmutga bo‘lgan vasvasa pul bilan bog‘liq», deb hisoblashga asos bor, dedi manba. Baxmut yaqinida, xususan, Yevropadagi eng yirik tuz koni - Artemovskoye joylashgan.

Oktabr oyida AQSh "Vagner" XHKni Ukrainadagi urushni moliyalashtirish uchun Afrikadagi tabiiy resurslardan foydalanganlikda aybladi. CNN xabar berishicha, Kreml Sudan harbiy xuntasi bilan til biriktirib, "Vagner" XHK nazorati ostida ushbu mamlakatda qazib olingan oltinni yashirin ravishda olib chiqib ketyapti.

Vashington ma’lumotlariga ko‘ra, urushga yuborilgan deyarli 50 000 XHK jangchilaridan 4 100 dan ortig‘i halok bo‘lgan va 10 000 nafari yaralangan. Ulardan 2022 yil noyabr oyining oxiridan dekabr oyi boshigacha Baxmut uchun janglarda mingdan ortiq yollanma askar halok bo‘ldi, dedi Oq uy vakili.

Dekabr oyi oxirida AQSh "Vagner" XHK Ukrainadagi Rossiya kuchlarini qo‘llab-quvvatlash uchun Shimoliy Koreyadan qurol-yarog‘ olganini ma’lum qildi, bu esa bu mojaroda yollanma askarlarning roli kengayib borayotganidan dalolat beradi, deya eslatadi Reuters. Shimoliy Koreya bu ayblovlarni rad etdi.

Oq uy Milliy xavfsizlik kengashining strategik aloqalar bo‘yicha koordinatori Jon Kirbi avvalroq Rossiya harbiy amaldorlari bir necha bor "Vagner" XHKning «qo‘mondonligiga bo‘ysungan»ligini ma’lum qilgandi. Kirbi, shuningdek, AQSh hisob-kitoblariga ko‘ra, Yevgeniy Prigojinning XHKsi harbiy amaliyotlarga oyiga taxminan 100 million dollar (94 million yevro) sarflayotganini ta’kidladi.