Belarus muxolifati mamlakatda yaqin orada safarbarlik boshlanishidan xavotirda

Belarus hukumati yaqin vaqt ichida Ukrainaga qarshi urushda Rossiyaga faol harbiy yordam ko‘rsatish uchun safarbarlikni boshlashi mumkin. Bu haqda Redaktionsnetzwerk Deutschland nashriga bergan intervyusida belaruslik muxolif siyosatchi Pavel Latushko bildirdi. Ushbu suhbatdan iqtiboslar 7 yanvar, shanba kuni chop etilgan. Latushkoning so‘zlariga ko‘ra, safarbarlik uchun deyarli hamma narsa tayyor, Belarus rahbari Aleksandr Lukashenko Kremldan kelgan buyruq bilan tugmachani bosishi kifoya.

Pavel Latushko Minskdagi manbalarga tayanib, Belarus ichki ishlar organlari xodimlarining aksariyati pasportlarini topshirishga majbur bo‘lganini ma’lum qildi. Bunday ma’lumotlar mamlakatning turli shaharlaridan kelgan. «Bu ular safarbarlik bo‘lgan taqdirda mamlakatni tark eta olmasligini bildiradi», deb tushuntirdi muxolifatchi. Bundan tashqari, uning qo‘shimcha qilishicha, Belarusda rus askarlari soni ham, Rossiyaning harbiy texnikasi ham ko‘paymoqda va mashg‘ulotlar muntazam ravishda Rossiya qo‘shinlari tomonidan alohida va Belarus bo‘linmalari bilan birgalikda o‘tkazilmoqda. 

Belarus Mudofaa vazirligi bir kun avval mamlakatga rossiyalik askarlar va harbiy texnikadan iborat yana bir eshelon kelgani haqida xabar bergan edi. Shu kuni Lukashenko Brest viloyatidagi Obuz-Lesnovskiy poligoniga tashrif buyurib, u yerda Belarus va Rossiya qo‘shinlarining mintaqaviy guruhi bo‘linmalari va qo‘shinlarining jangovar muvofiqlashtirish ishlari yakunlangani haqidagi hisobotlarni tingladi. Ukraina Rossiya Kiyevni egallashga urinib, Belarus hududidan navbatdagi hujum uyushtirishi mumkinligidan xavotirda.