Berbok Ukrainaga minalardan tozalash uchun yana 40 mln yevro va’da qildi

Germaniya tashqi ishlar vaziri Annalena Berbok 10 yanvar, seshanba kuni e’lon qilinmagan tashrif bilan Xarkivga keldi. U Rossiyaning keng ko‘lamli harbiy bosqini boshlanishidan keyin Ukraina sharqiy qismiga kelgan Germaniya hukumatining birinchi a’zosi bo‘ldi.

Berbok Kiyevga poyezdda yetib keldi va u yerdan ertalab soat 7:00 da Xarkivga jo‘nab ketdi - haftalik Der Spiegel nashriga ko‘ra, Ukraina tomonidan JCh-2012 uchun sotib olingan Janubiy Koreya poyezdida. Germaniya tashqi ishlar vazirligi rahbariga ukrainalik hamkasbi Dmitri Kuleba va Ukrainaning Germaniyadagi elchisi Oleksiy Makeyev hamrohlik qildi.

«Ukrainadagi odamlar bizning yordamimiz va birdamligimizga ishonishlari mumkinligini bilishi kerak», dedi Annalena Berbok Xarkivda. U Germaniyadan Ukrainaga «qishki yordam» deb atalgan generatorlar, ko‘rpa-to‘shaklar va yoqilg‘i va’da qildi. Bundan tashqari, Germaniya hukumati minalarni tozalash va Starlink sun’iy yo‘ldosh aloqa xizmatlarini moliyalashtirish uchun Kiyevga qo‘shimcha ravishda 40 million yevro ajratadi. Berbok «Ukraina rus bosqinchilari terroridan aziyat chekayotgan fuqarolarini ozod qilish uchun zarur bo‘lgan» qurol-yarog‘larning keyingi yetkazib berilishini eslatib o‘tdi.

Germaniya Tashqi ishlar vazirligi rahbarining safari GFR Ukrainaga 40 ga yaqin Marder piyoda askarlar jangovar mashinalari yetkazib berilishini e’lon qilganidan bir necha kun o‘tgach sodir bo‘ldi. Kiyev ushbu harbiy texnikani 2023 yilning birinchi choragida olishi kutilmoqda.

Annalena Berbokning aytishicha, u Xarkivda Rossiya armiyasi tomonidan sodir etilgan harbiy jinoyatlar va insoniyatga qarshi jinoyatlar ko‘lamini his qilgan. Shu bilan birga, u Ukrainaning boshqa shaharlarini ham ozod qilish muhimligini ta’kidladi. Shuningdek, «biz bu harbiy qishda Ukraina Yevropa oilamizdagi o‘rnini unutmasligimiz muhim», dedi Berbok mamlakat Yevropa Ittifoqiga yo‘lini allaqachon boshlaganini eslatib. U Germaniya Ukrainaga Yevropa standartlariga erishishda, birinchi navbatda, qonun ustuvorligi va mustaqil institutlarni rivojlantirishda yordam berishga tayyorligini e’lon qildi.