Lukashenko rossiyalik Sofiya Sapegani afv etishdan bosh tortdi

Rossiyalik Sofiya Sapegaga Belarusda afv etish bo‘yicha arizasi rad etildi. Bu haqda 10 yanvar, seshanba kuni qizning advokati Anton Gashinskiyga asoslanib, «Mediazona. Belarus» internet nashri xabar berdi.

Ayni paytda, TASS agentligi ham Gashinskiyga tayanib, Sapeganing himoyasi mahkum ayolni jazo muddatini Rossiyada o‘tash uchun yaqin vaqt ichida RFga o‘tkazish bo‘yicha so‘rov yuborish niyatida ekanligini yozmoqda. «Biz uni (Sapegani) jazoni Rossiya Federatsiyasida o‘tashi uchun yuborishni so‘raymiz. Bunday holda, u Rossiya prezidentiga uni qolgan muddatni o‘tashdan ozod qilish iltimosi bilan murojaat qilishi mumkin bo‘ladi», - deya advokatning so‘zlarini keltirgan agentlik.

Sapeganing onasi Anna Dudichning so‘zlariga ko‘ra, u qizining maktubidan 4 yanvar kuni Belarus hukumati qizni afv etishdan bosh tortgani haqida xabar topgan.

Sofiya Sapega 2021 yilning may oyida o‘sha paytdagi tanishi, Nexta Telegram-kanali sobiq bosh muharriri Roman Protasevich bilan qo‘lga olingan. Buning uchun Belarus hukumati Irlandiyaning Ryanair aviakompaniyasiga tegishli, Afinadan Vilnyusga uchayotgan samolyotini Minskda favqulodda qo‘nishga majbur qildi.

Sapega Belarus xavfsizlik xodimlarining shaxsiy ma’lumotlarini e’lon qilgan «Chernaya kniga Belarusi» Telegram-kanalini boshqarishda ayblandi. 2022 yil may oyida qiz olti yillik qamoq jazosiga hukm qilindi.

2022 yil iyun oyida Sapega Belarus rahbari Aleksandr Lukashenkoga afv etish haqidagi iltimosnoma bilan murojaat qilib, unda uni «yoshlik va ahmoqlik jinoyatga undaganini» ko‘rsatdi.