Kun.uz Toshkent Xalqaro aeroportida kutib oluvchilar ichkariga kiritilmasligi, sovuq ob-havoda ular qanday sharoitda turganliklari haqida tanqidiy reportaj e’lon qilgandi. Buning ortidan kutib oluvchilar uchib kelish zallariga kirishi hamda terminal ichida (bojxona hududigacha bo‘lgan joyda) uchib kelayotgan yo‘lovchilarni kutishlari mumkin bo‘ldi. Faqat bu sovuq kunlar uchungina joriy qilingan tartib bo‘lishi mumikn.
Anomal sovuq ob-havo munosabati bilan respublika aeroportlari binosiga kutib oluvchilarning kiritilishiga ruxsat berildi. Ilgari kutib oluvchilarni binoga kiritish aeroportlarda faoliyat yurituvchi bir qator tuzilmalarning hujjatlari bilan cheklangan edi. Bugundan boshlab barcha kutib oluvchilar uchib kelish zallariga kirib, terminal ichida bojxona hududigacha bo‘lgan joyda uchib kelayotgan yo‘lovchilarni kutishlari mumkin bo‘ladi.
“Nihoyat, bizning takliflar eshitilgani va davlat rahbariyati tomonidan irodali qaror qabul qilinganidan juda xursandmiz. Bilaman, muammo ko‘p yillar davomida mavjud edi. Odamlar issiqda va sovuqda tashqarida turishgan va xavfsizlik nuqtai nazaridan va boshqa bir qator sabablarga ko‘ra ularni ichkariga kiritish taqiqlangan. 2018 yilda qurilgan uchib kelish zali ham xalqaro standartlarga javob bermaydi, unda kutib oluvchilar uchun joy ajratilmagan. Uning ustiga zal juda kichkina. Biz hozirda binoning old qismini surish orqali zal maydonini ko‘paytirish loyihasini ishlab chiqmoqdamiz, bu yerda kutib oluvchilar uchun sharoit yaratish mumkin bo‘ladi. Jarayon, zal atrofida ko‘plab kommunikatsiyalar o‘rnatilganligi sababli murakkablashmoqda. Har safar, biz mavjud aeroportni qayta qurish, kengaytirish, qulayroq qilish uchun harakat qilishga qo‘l urganimizda, poytaxtimizga yangi aeroport qurish kerak ekanligiga ishonch hosil qilmoqdamiz. Ammo, aeroportlar bir kunda bunyod etilmasligini hisobga olib, imkon qadar mavjud aeroportni rekonstruksiya qilmoqdamiz”, — dedi “Uzbekistan Airports” AJ boshqaruvi raisi Ra’no Jo‘rayeva.
“Uzbekistan Airports”ning bayonotidan anglashilishicha, mazkur tartib doimiy bo‘lmaydi, bu sharoit faqat sovuq ob-havo hukm surib turgan kunlar uchun amal qiladi.
