Leopard tanklari bo‘yicha qaror hali qabul qilinmadi - Pistorius 

Ukrainaga asosiy Leopard tankini yetkazib berish bo‘yicha qaror hali qabul qilinmagan. Bu haqda jurnalistlarga 20 yanvar, juma kuni Germaniya mudofaa vaziri Boris Pistorius Ukraina mudofaasi bo‘yicha aloqa guruhining Amerikaning Ramshtayn bazasidagi yig‘ilishi doirasida ma’lum qildi. Vazirning so‘zlariga ko‘ra, bu masala muhokama qilingan: uning tarafdorlari ham, muxoliflari ham bor.

Germaniya harbiy idorasi boshlig‘ining so‘zlariga ko‘ra, bugun ertalab u vazirlikka Leopard tanklari parkida reviziya o‘tkazishni buyurgan. Gap Bundesverda xizmat ko‘rsatayotgan va ishlab chiqaruvchilarda bo‘lgan mashinalar haqida ketyapti. Tanklar sonini, shuningdek, ularning sheriklar jangovar transportlariga mosligini aniqlash kerak. «Leopard tanklarini yetkazib berish bo‘yicha qaror qaysi nuqtada qabul qilinishini hozircha ayta olmaymiz, biroq ittifoqchilar bilan kelishuvga erishilsa, buni tezda qabul qilish mumkin», dedi Pistorius.

Vazir jurnalistlarga, shuningdek, Ukraina uchun bugungi kundagi asosiy masalalar havo va raketaga qarshi mudofaa ekanligini aytdi. Pistorius Kiyev Berlindan Patriot zenit-raketa tizimini olishini tasdiqladi, shuningdek, yana yettita Gepard o‘ziyurar zenit qurollari yetkazib berilishini ma’lum qildi.

Ukrainaning Germaniyadagi sobiq elchisi Andrey Melnik Germaniya hukumatini Ukrainaga Leopard tanklarini yetkazib berishga qarshi turishni bas qilishga chaqirdi. «Biz yangi mudofaa vaziri Boris Pistoriusni bugun Ramshtaynda tanklar bilan «qo‘g‘irchoqbozlik»ni to‘xtatishga va zudlik bilan Ukrainaga nemis Leopard'larini yetkazishga ruxsat berishga chaqiramiz», dedi Ukraina tashqi ishlar vaziri o‘rinbosari Süddeutsche Zeitung gazetasiga bergan intervyusida. 

Melnikning fikricha, Germaniya endi amerikaliklarning orqasiga yashirinmasligi kerak. «Haqiqiy yetakchilikni namoyish etish va Ukrainani Bundesver va Germaniya qurol-yarog‘ sanoatining barcha mavjud qurollari bilan so‘zsiz qo‘llab-quvvatlashga hali kech emas», - dedi u.