Ispaniyada bombali xatlar yuborishda gumon qilingan shaxs qamoqqa olindi

Ispaniyada bombalar bilan xat jo‘natganlikda gumon qilingan shaxs garov evaziga chiqish huquqisiz hibsga olindi. Madriddagi Milliy sudning (Audiencia Nacional) tergov sudyasi 27 yanvar, juma kuni 74 yoshli erkakni terrorizm bo‘yicha to‘rtta va og‘irlashtiruvchi holatlarda terrorizm bo‘yicha esa ikkita band (bosh vazir Pedro Sanches va mudofaa vaziri Margarita Roblesga bomba yuborgani uchun) bilan aybladi, deyiladi sud xabarida.

Jinoyatchi deb taxmin qilingan shaxs ikki kun avval Madriddan 300 kilometr shimolda joylashgan Miranda-de-Ebro shahrida qo‘lga olingan. Uning uyini tintuv qilish chog‘ida «portlovchi moddalarni tashlash» uchun ishlatilishi mumkin bo‘lgan uchuvchisiz uchish apparati va elektron qurilmalar topilgan.

Noyabr oyi oxiri va dekabr oyi boshida portlovchi moddalar solingan oltita xat yuborilganlar orasida bosh vazir Sanches va Mudofaa vazirligi rahbaridan tashqari, Madriddagi Ukraina va AQSh elchixonalari, Torrexon-de-Ardosdagi aviabazaning sun’iy yo‘ldosh markazi va Ukrainaga yetkazib beriladigan qurol ishlab chiqaruvchisi Instalaza ofisi ham bor edi.

Gumonlanuvchining terrorchi to‘da yoki uyushgan guruhga tegishli ekanligiga dalil yo‘q, deya ta’kidladi tergov sudyasi hisobotda. Biroq, uning so‘zlariga ko‘ra, hammasi Rossiya bilan aloqasi bo‘lgan shaxs tomonidan Ukraina tarafdorlariga hujum qilish maqsadida amalga oshirilganidan dalolat beradi.