O‘zbekiston va Ispaniya OTM konchilik bo‘yicha qo‘shma loyihalarni amalga oshiradi

Navoiy davlat konchilik va texnologiyalar universiteti (NDKTU) va Ispaniyaning Ovedo universiteti (OU) vakillari o‘rtasida onlayn muzokaralar tashkil etildi, deb xabar bermoqda «Dunyo».

Foto: Dunyo AA

Uchrashuvda O‘zbekiston tomonidan Navoiy davlat konchilik va texnologiyalar universitetining xalqaro hamkorlik bo‘yicha prorektori Shuhrat Aliqulov, Ispaniya tomonidan Ovedo universitetining xalqaro aloqalar masalalari bo‘yicha prorektori Xesus Daniel Santos Rodriges va GEDEPSA kompaniyasining bosh direktori Alexandro Pastrana Molero ishtirok etdi.

Shuhrat Aliqulov Ispaniyaning Ovedo universiteti bilan hamkorlik aloqalarini o‘rnatish va qo‘shma loyihalarni joriy qilishdan ham manfaatdor ekanligini bildirdi. O‘z navbatida, Ovedo universitetining xalqaro aloqalar masalalari bo‘yicha prorektori Xesus Daniel Santos Rodriges O‘zbekiston universiteti bilan yaqin aloqalarni o‘rnatishga tayyor ekanini aytdi.

Uchrashuv so‘ngida konchilik, energetika va materialshunoslik yo‘nalishlarida qo‘shma loyihalarni amalga oshirishga kelishib olindi.