Rossiya Myunxen xavfsizlik konferensiyasiga taklif qilinmadi

Bu yil Myunxen xalqaro xavfsizlik konferensiyasiga Rossiya hukumati vakillari taklif qilinmayapti, deb ma’lumot berdi konferensiya raisi Kristof Xoysgen 1 fevral, chorshanba kuni MDR telekanaliga bergan intervyusida. U buni Rossiya prezidenti Vladimir Putinning targ‘iboti uchun xavfsizlik masalalari bo‘yicha nufuzli xalqaro forumda platforma taqdim etishni istamasligi bilan izohladi.

«Kremldan biz har kuni eshitayotgan bayonotlar Rossiya Putin urush maqsadi deb e’lon qilgan narsadan, ya’ni Ukrainani yo‘q qilishdan bir zarra ham chekinadi, degan xulosaga kelishimizga imkon bermaydi», deb tushuntirdi Xoysgen. Unga ko‘ra, hukumat amaldorlari o‘rniga Rossiyadan fuqarolik jamiyati va muxolifat vakillari, jumladan shaxmat bo‘yicha sobiq jahon chempioni Garri Kasparov va oligarx Mixail Xodorkovskiy taklif qilingan. 

Avvalroq sobiq kansler Angela Merkelning tashqi siyosat bo‘yicha maslahatchisi bo‘lib ishlagan Xoysgen Germaniyaning Ukrainani qo‘llab-quvvatlashini himoya qilyapti. 

«Putin oxir-oqibat sovet ittifoqini qayta tiklashni xohlashini aniq aytdi. Agar Rossiya prezidenti Ukrainada muvaffaqiyat qozonsa, u Boltiqbo‘yi mamlakatlariga ham bostirib kiradi. Bu davlatlar NATOga a’zo bo‘lgani uchun Germaniyaga, ittifoqchilik majburiyatlariga bevosita ta’sir qiladi. Buning oldini olish kerak, shuning uchun Ukrainaga yordam berish kerak», dedi Kristof Xoysgen. 

Xalqaro Myunxen xavfsizlik konferensiyasi 17 fevral kuni ochiladi.