«O‘zbekiston-Xitoy sanoat parki» tashkil etiladi

O‘zbekiston elchixonasi va Navoiy viloyati hokimligi o‘rtasida Navoiy – Xitoy savdo-iqtisodiy va investitsiyaviy hamkorligini jadallashtirish bo‘yicha 2023 yilga mo‘ljallangan «yo‘l xaritasi»ni imzolash kelishib olindi.

Mazkur «yo‘l xaritasi»ga asosan joriy yilda bir qator ustuvor vazifalarni amalga oshirish belgilangan. Navoiy viloyati va Xitoyning Futszyan provinsiyasi o‘rtasida hamkorlik bitimini imzolash, viloyatda «O‘zbekiston-Xitoy sanoat parki»ni tashkil etish, unda kimyo, qurilish materiallari va sanoatning boshqa muhim yo‘nalishlarida investitsion loyihalarni amalga oshirish, «Navoiy» EIZ direksiyasi va Shenjyen maxsus iqtisodiy zonasi kompaniyalari o‘rtasida hamkorlik o‘rnatish shular jumlasidan.

Uchrashuvda viloyatda elektr energiyasi ishlab chiqarish quvvatlarini yanada oshirish maqsadida Xitoyda ishlab chiqarilayotgan muqobil elektr energiyasi ishlab chiqarish tizimlarini Navoiy viloyatidagi yirik sanoat korxonalarida joriy etish masalalari muhokama qilindi. Kelgusida quyosh panellarini viloyat hududida ishlab chiqarishga qaratilgan loyihalarni amalga oshirish borasida fikr almashildi.

Muzokaralarda o‘zaro hamkorlikda tog‘-kon, kimyo, mashinasozlik, tekstil va to‘qimachilik, qurilish materiallari kabi qator sohalarni rivojlantirish istiqbolli ekanligiga e’tibor qaratilib, tomonlar Navoiy viloyatida xitoylik investorlar uchun yaratilgan imkoniyatlar hamda Xitoy tomonidan investitsiyalarni jadallashtirish masalalarini muhokama qildi.