Markaziy Osiyo davlatlarining birinchi parlamentlararo forumida Turkiston deklaratsiyasi qabul qilindi

10 fevral kuni Qozog‘istonning Turkiston shahrida Markaziy Osiyo davlatlarining birinchi parlamentlararo forumi bo‘lib o‘tdi. Unda O‘zbekiston Oliy Majlisi Senati raisi Tanzila Norboyeva boshchiligidagi parlament delegatsiyasi ham ishtirok etdi.

Forum ishtirokchilariga Markaziy Osiyo davlatlari rahbarlari qutlov so‘zlarini yo‘lladilar. O‘zbekiston prezidenti Shavkat Mirziyoyevning qutlov so‘zini Oliy Majlis Senati raisi Tanzila Norboyeva o‘qib eshittirdi.

Forumda Markaziy Osiyo mamlakatlari o‘rtasida strategik hamkorlikni mustahkamlash va ushbu jarayonda parlamentlarning rolini yanada oshirishga doir masalalarga alohida e’tibor qaratildi.

Forumda mintaqaviy hamkorlikni rivojlantirish borasida parlament diplomatiyasining o‘rni va ahamiyati tobora ortib borayotgani, ayniqsa, global tahdidlar kuchayib borayotgan hozirgi sharoitda qardosh va o‘zaro do‘st xalqlar parlamentlarining sa’y-harakatlarini birlashtirish, ularning salohiyatidan yanada kengroq foydalanish har qachongidan ham muhim ahamiyat kasb etayotgani qayd etildi.

O‘zbekiston parlamenti delegatsiyasi rahbari o‘z so‘zida Markaziy Osiyodagi o‘zaro manfaatli hamkorlikni jadal rivojlantirishga qaratilgan ishlar, o‘z navbatida, parlament a’zolari zimmasiga katta mas’uliyat yuklashini qayd etib o‘tdi.

«Xalqaro siyosatdagi yuqori turbulentlik sharoitida va jahon iqtisodiyotida inqirozli hodisalarning kuchayishi fonida Markaziy Osiyo davlatlari parlamentlarining sa’y-harakatlarini birlashtirish, yuzaga kelayotgan muammolarni birgalikda hal etishga bo‘lgan ehtiyoj tobora ortib bormoqda. Ushbu Forumning yo‘lga qo‘yilishi esa ana shunday hayotiy talablarni qondirish bilan bir qatorda, mintaqaviy hamkorlikka sezilarli darajada sur’at bag‘ishlaydi hamda xalqlarimizning yanada yaqinlashishiga turtki beradi. Mintaqa davlatlari parlamentlarining samarali muloqoti bo‘yicha yo‘lga qo‘yilayotgan mazkur yangi platforma doirasida mamlakatlar qonun chiqaruvchi organlari o‘zaro hamkorligining huquqiy asoslarini mustahkamlash borasidagi ishlarni yanada faollashtirishimiz kerak. Shuningdek, milliy qonunchilik asoslarini o‘zaro uyg‘unlashtirish va yaqinlashtirish bo‘yicha qonunchilik normalarini chuqur tahlil qilish hamda takomillashtirish maqsadga muvofiq», deb ta’kidladi Senat raisi.

Forumda umumiy tarixiy-madaniy merosga asoslangan madaniy-gumanitar hamkorlikni kengaytirishda parlament a’zolarining ishtirokini yanada kuchaytirish masalalari ham muhokama markazida bo‘ldi.

Tadbir yakunida Markaziy Osiyo davlatlarining birinchi parlamentlararo forumining mintaqa mamlakatlari o‘rtasidagi har tomonlama strategik sheriklikni qo‘llab-quvvatlash maqsadida parlamentlararo aloqalarni yanada mustahkamlashga qaratilgan Turkiston deklaratsiyasi qabul qilindi.