Moldova Yevropa Ittifoqidan rossiyaparast oligarxlarga qarshi sanksiyalar joriy etishni so‘radi

Kishinyov Yevropa Ittifoqidan «Rossiya bilan birgalikda Moldovani beqarorlashtirishga urinayotgan korrupsion oligarxlar va siyosatchilar»ga qarshi sanksiyalar joriy qilishni talab qilmoqda. Bu haqda Moldova tashqi ishlar vaziri Niku Popesku 20 fevral, dushanba kuni Bryusselda bo‘lib o‘tgan Yevropa Ittifoqi tashqi ishlar kengashi yig‘ilishida ma’lum qildi.

Unga ko‘ra, jazo choralari aktivlarni muzlatish va viza berishni taqiqlashni o‘z ichiga olishi kerak. Shu yo‘l bilan Moldova hukumati bu oligarxlarning «ichki siyosatga pul kiritish va hukumatni ag‘darishga urinishlari uchun namoyishchilar hamda potensial xavfli guruhlarga pul to‘lash» imkoniyatlarini cheklashga umid qilmoqda», deb tushuntirdi vazir.

«Bu korrupsion siyosatchilar Rossiya bilan hamkorlikda ishlayotgani, Rossiyadan ochiq jamoatchilik yordamini olayotgani va Moldovaga qarshi gibrid urush olib borayotgani aniq», - dedi Popesku. Uning ta’kidlashicha, o‘z mamlakatiga gibrid tahdidlar sirasiga siyosiy partiyalarni noqonuniy moliyalashtirish, pulli namoyishlar, kiberhujumlar, bombalar haqidagi yolg‘on xabarlar, energiya ta’minoti va ularning narxini manipulyatsiya qilish kiradi.

Moldova Tashqi ishlar vazirligi rahbari muhokama qilinayotgan siyosatchilarning ismini aytmadi, lekin ular Moldovadan qochib ketgani, ulardan biri Isroilda ekani hamda AQSh va Buyuk Britaniya sanksiyalari ostida ekanliklarini eslatib o‘tdi. Bu ikki davlat 2019 yilda Moldovadan qochgan oligarxlar Ilan Shor va Vladimir Plaxotnyukka nisbatan korrupsiya bo‘yicha ayblovlar tufayli jazo choralari qo‘llagan.