Duma Rossiyaning SHQShdagi ishtiroki to‘xtatilishini ma’qulladi

Davlat dumasi Rossiya Federatsiyasining Strategik hujum qurollarini qisqartirish va cheklash to‘g‘risidagi shartnomada (SHQ) ishtirokini to‘xtatuvchi qonun loyihasini qabul qildi. 22 fevral, chorshanba kuni deputatlar shu kuni Rossiya prezidenti Vladimir Putin kiritgan hujjatni bir ovozdan qo‘llab-quvvatladi. 

Bir kun avval Federal majlis oldida nutq so‘zlagan Putin Moskva SHQ shartnomasidagi ishtirokini to‘xtatayotganini va yangi yadro qurollarini sinovdan o‘tkazishga tayyorligini, biroq bunday sinov AQSh tomonidan amalga oshirilgan taqdirdagina yuz berishini aytgan edi. 

Uning ta’kidlashicha, mamlakat kelishuvdan chiqmaydi, faqat undagi ishtirokini to‘xtatadi. Boshqa yadroviy davlatlar yadro qurolining yangi turlarini yaratish ustida ishlamoqda, dedi Rossiya prezidenti qarorning mantiqiy asosi sifatida. Uning so‘zlariga ko‘ra, G‘arb davlatlari «o‘zlari strategik mag‘lubiyatga uchratish niyatida ekanini ochiq aytmoqda» va shu bilan birga «yadroviy inshootlarga yopishyapti». 

Strategik hujum qurollari to‘g‘risidagi shartnoma (SHQ-3) AQSh va Rossiya o‘rtasida qurol nazorati bo‘yicha yagona yirik kelishuvdir. Ishtirokchi davlatlarning yadro arsenallari kengayishining oldini olishga qaratilgan ushbu shartnoma 2010 yilda Pragada imzolangan va 2011 yilda kuchga kirgan. 2021 yilda, Jo Bayden Qo‘shma Shtatlar prezidenti lavozimini egallaganidan so‘ng, shartnoma yana besh yilga, 2026 yil 5 fevralgacha uzaytirildi. 2023 yil yanvar oyi oxirida Vashington Moskvani SHQ-3 shartnomasi bo‘yicha o‘z majburiyatlarini bajarmaganlikda aybladi.