Belgorod oblastining Ukraina chegarasiga yaqin hududida Su-25 quladi

Belgorod oblastida Rossiya harbiy kosmik kuchlariga tegishli Su-25 rusumli shturmovik quladi, uchuvchi halok bo‘lgan. Rossiya mudofaa vazirligi dastlabki ma’lumotlarga ko‘ra halokatga texnik nosozlik sabab bo‘lganini ma’lum qilgan.

RF mudofaa vazirligi harbiy samolyot «jangovar topshiriqni bajarib, Belgorod oblastidagi aerodromdagi bazaga qaytayotgan vaqtda» halokatga uchraganini ma’lum qilgan.

Jangovar topshiriq aynan nima bo‘lganiga aniqlik kiritilmagan. Belgorod oblasti Rossiya bir yildan buyon urush olib borayotgan Ukrainaga chegaradosh hisoblanadi.

«Uchuvchi halok bo‘lgan», - deyilgan vazirlik xabarida. Avvalroq TASS agentligi pilot katapulta bo‘lishga ulgurganini xabar qilgandi (shu bilan birga, agentlik manbasi Su-25 shturmovigi emas, Su-24 rusumli front bombardimonchisi halokatga uchraganini aytgandi).

«Samolyot odamlar yashamaydigan hududga qulagan, quruqlikda vayrongarchiliklar kuzatilmagan. Dastlabki ma’lumotlarga ko‘ra, halokatga texnik nosozlik sabab bo‘lgan», deyiladi RF mudofaa vazirligidan iqtibos keltirgan «Interfaks» xabarida.

Harbiy samolyot halokatga uchragani haqida dastlab Belgorod oblasti gubernatori Vyacheslav Gladkov xabar bergandi (rusumiga aniqlik kiritmagan holda). «Valuyki shahar okrugi hududida mudofaa vazirligi samolyoti quladi. Hozirda voqea joyida tergov guruhi va FVV xodimlari ish olib bormoqda. Hodisa sabablari o‘rganilmoqda. Vaziyat nazorat ostida», deya yozgan u telegram-kanalida.

«Samolyot qishloq atrofida avariyaga uchradi. Pilot katapulta qilishga ulgurdi. Uning holati aniqlashtirilmoqda», deya xabar berdi TASS agentligining kuchishlatar tuzilmalardagi manbasi.

«Aholi qurilmasiga urilgan. Fuqarolar orasida qurbonlar yo‘q. Pilotning o‘zi katapulta bo‘lgan va omon qolgan», - deya yozadi harbiylashgan bloger Boris Rojin telegram-kanalida.

Baza nashriga ko‘ra, uchuvchi hospitalga olib ketilgan, ammo ko‘p o‘tmay olingan tan jarohatlari oqibatida vafot etgan. 

2022 yil 17 oktyabrida Su-34 rusumli qiruvchi-bombardimonchi samolyot Krasnodar o‘lkasida Yeysk shahridagi turar joy binosiga kelib urilgan, natijada 15 kishi halok bo‘lgandi. RF mudofaa vazirligi ikki uchuvchi ham katapulta qilingani va ular omon qolishgani haqida xabar bergan.

Su-25 - jang maydonida quruqlik qo‘shinlarini qo‘llab-quvvatlash, quruqlikdagi nishonlar va havodagi past tezlikda harakatlanuvchi nishonlarni yo‘q qilish uchun mo‘ljallangan, har qanday ob-havo sharoitida ucha oluvchi, tovush tezligidan past tezlikda harakatlanuvchi zirhli reaktiv shturmovik hisoblanadi. 1970-yillarning birinchi yarmida Suxiy nomidagi tajriba-konstruktorlik byurosida ishlab chiqarila boshlagan.

Ukrainaning Xarkiv oblasti bilan chegaradosh bo‘lgan Belgorod oblasti Rossiyaning bir yil muqaddam boshlagan keng ko‘lamli bosqini davomida ko‘p marta Ukraina tomonidan turib o‘qqa tutilgan.