Hukumat qurilish materiallari ishlab chiqaruvchilar uchun yangi dastur qabul qiladi

Vazirlar Mahkamasining “Hududlarda qurilish materiallari sanoatida ishlab chiqarish hamda eksport hajmini oshirishga doir qo‘shimcha chora-tadbirlari to‘g‘risida”gi qarori loyihasi e’lon qilindi.

2023-2026 yillarda qurilish materiallari ishlab chiqaruvchilar uchun «Sanoat ipotekasi» dasturi tasdiqlanadi. Bunda, «Sanoat ipotekasi» dasturi doirasida 7 yillik, 2 yil imtiyozli davr bilan (milliy valutada O‘zbekiston Markaziy banki qayta moliyalashtirish stavkasining 1,5 barobaridan kam bo‘lmagan hamda xorijiy valutadagi kredit liniyasi shartidan kelib chiqib 3 foizdan kam bo‘lmagan bank marjasi ostida) kreditlar berilishi belgilanadi.

Iqtisodiyot va moliya vazirligi qurilish materiallari ishlab chiqarish klasterlarini tashqi infratuzilma bilan ta’minlash uchun zarur mablag‘larni ajratish bo‘yicha 2024 yilda tasdiqlanadigan budjet parametrlarida hisobga olinishini ta’minlaydi.

Navoiy, Samarqand va Toshkent viloyati hokimliklari, Investitsiyalar, sanoat va savdo vazirligi, «O‘zsanoatqurilishmateriallari» uyushmasi, Qurilish materiallari sanoatini rivojlantirish bo‘yicha Kengash tegishli idoralar bilan birgalikda 2023-2024 yillarda kaolindan klaster usulida tayyor mahsulotlar ishlab chiqarish bo‘yicha kamida 200 million AQSh dollarlik 10 ta loyiha amalga oshirilishini ta’minlaydi.

Markaziy bank va tijorat banklariga qurilish materiallari ishlab chiqarish uchun ajratilgan kreditlar to‘lov muddatlari qayta ko‘rilganda kreditlar sifatini past toifada tasniflamaslik va ular bo‘yicha zaxira yaratmaslik sharti bilan uzaytirish tavsiya etiladi.

Investitsiyalar, sanoat va savdo vazirligi, Qurilish materiallari sanoatini rivojlantirish bo‘yicha Kengash, «O‘zsanoatqurilishmateriallari» uyushmasi tegishli idoralar bilan birgalikda 2023 yilda qurilish materiallari sanoat korxonalari jami eksportini 1,0 mlrd dollarga yetkazish va buning uchun yangi ishga tushirilgan korxonalarni eksportga jalb qilish, qurilish materiallari ishlab chiqarish hajmini 35 trln so‘mga yetkazilib, xorij bozorlariga talabi yuqori bo‘lgan qurilish materiallari bo‘yicha eksport hajmini oshirish choralarini ko‘radi.