Mudofaa budjetini to‘ldirish: Daniyada davlat bayrami bekor qilindi

Daniyaning bir palatali parlamenti – Folketing mamlakatda 17-asrdan beri nishonlanib kelinayotgan Buyuk Ibodat kunining davlat bayrami sifatidagi maqomini bekor qilish uchun ovoz berdi. 28 fevral, seshanba kuni qabul qilingan qarorni 95 deputat qo‘llab-quvvatladi, 68 deputat qarshi chiqdi. Bosh vazir Mette Frederiksen (sotsial-demokrat) hukumati tomonidan ilgari surilgan chora mudofaa budjetini moliyalashtirishni ko‘paytirishga qaratilgan. Vazirlar mahkamasi hisob-kitoblariga ko‘ra, qo‘shimcha ish kuni davlat g‘aznasiga taxminan uch milliard Daniya kronasini (400 million yevro) olib kelishi kerak.

Hukumat 2033 yilda emas, balki 2030 yilda NATO talab qiladigan YaIMning ikki foizini tashkil etish maqsadiga erishish uchun mudofaa budjetiga qo‘shimcha daromad sarflash niyatida. Bu harakat Rossiyaning Ukrainaga keng ko‘lamli bostirib kirishi fonida zarur, dedi Frederiksen.

«Menimcha, yana bir kun ishlash muammo emas», dedi hukumat rahbari. Uning so‘zlariga ko‘ra, rasmiylar mudofaa, xavfsizlik, sog‘liqni saqlash va yashil o‘zgarishlar bo‘yicha «katta xarajatlar»ga duch kelishmoqda va «manevr qilish uchun moliyaviy imkoniyat yo‘q».

Yangi hukumat tegishli rejalarni 2022 yil dekabr oyida e’lon qildi.

Daniya kasaba uyushmalari konfederatsiyasi bunga javoban norozilik petitsiyasini boshlab yubordi, unda 470 mingdan ortiq imzo to‘plandi. Birlashgan kasaba uyushmalari harakati ham hukumatni referendum o‘tkazishga chaqirdi. Biroq tashkilotchilar taklifni referendumga qo‘yish uchun zarur bo‘lgan qo‘llab-quvvatlovni ololmadi. Fevral oyi boshida Kopenhagendagi parlament binosi oldiga 50 mingga yaqin odam hukumat rejalariga qarshi norozilik namoyishiga chiqqan edi.