Pentagon Rossiyaning Ukrainadagi jinoyatlari haqidagi ma’lumotlar berilishiga qarshi chiqdi

Pentagon AQSh prezidenti Jo Bayden ma’muriyati Haagadagi Xalqaro jinoiy sudga (XJS) Amerika razvedkasidan olingan Rossiyaning Ukrainadagi harbiy jinoyatlari faktlarini tasdiqlovchi ma’lumotlarini topshirganiga qarshi. 8 mart, chorshanba kuni The New York Times (NYT) nashri Oq uyning amaldagi va sobiq xodimlariga tayanib xabar berishicha, AQSh harbiylari bu XJSga amerikaliklarni javobgarlikka tortish imkonini beruvchi pretsedent yaratishidan tashvishlanmoqda.

Nashr suhbatdoshlariga ko‘ra, AQSh ma’muriyatining qolgan qismi, jumladan, razvedka idoralari, Davlat departamenti va Adliya vazirligi tegishli ma’lumotlarni Haaga sudiga taqdim etish tarafdori. NYT ma’lumotlariga ko‘ra, 3 fevral kuni AQSh Milliy xavfsizlik kengashi ushbu masala bo‘yicha kelishuvga erishish uchun vazirlar yig‘ilishini o‘tkazgan, biroq Pentagon rahbari Lloyd Ostin va bir qator harbiy rahbarlar o‘sha yig‘ilishda ma’lumotlarning Haagaga berilishiga qarshi chiqishgan.

Manbalarga ko‘ra, prezident Bayden hali AQShning Xalqaro jinoiy sud bilan hamkorligi bo‘yicha yakuniy qarorga kelgani yo‘q.

Tegishli ma’lumotlar Xalqaro jinoiy sud bosh prokurori Karim Xon tomonidan bir yil avval boshlangan tergovga yordam berishi mumkin. The New York Times nashrining yozishicha, Amerika razvedkasi tomonidan to‘plangan ma’lumotlar Rossiya rahbariyatining fuqarolik infratuzilmasiga zarba berish va bosib olingan Ukraina hududlaridan bolalarni Rossiyaga majburan olib ketish qarorlari haqidagi materiallarni o‘z ichiga oladi.