“Tashabbusli budjet”ga ovoz berishda Face ID joriy etiladi 

Iqtisodiyot va moliya vazirligi budjet tashkiloti xodimlarini maktabgacha va maktab ta’limi sohasidagi loyihalarga ovoz berishga majburlash holatlari kuzatilayotganini tasdiqladi.

Bundan tashqari, vazirlik yirik mahallalar aholi soni yuqori bo‘lgani sababli ovoz berishda ustunlikka ega bo‘lish holatlarini aniqlagan. 

Iqtisodiyot va moliya vazirligi ovoz berishda tengsizlikka yo‘l qo‘ymaslik, shuningdek, barcha mahallalar aholisi uchun loyihalarni amalga oshirishda teng imkoniyatlar yaratish maqsadida bir qancha texnik va uslubiy yechimlar ishlab chiqilayotganini ma’lum qildi.

Jumladan, Face ID yordamida identifikatsiya qilish mexanizmi joriy etiladi. Bunda tasdiqlangan foydalanuvchilar tomonidan berilgan ovozlar SMS orqali berilgan 5 yoki 10 ovozga tenglashtiriladi. 

Ko‘paytirish koeffitsiyentini joriy etish amaliyoti ko‘rib chiqiladi. Bunda, kichik mahallalar loyihalariga katta mahallalar aholisi tashabbusi bilan teng sharoitlarda raqobatlashish imkoniyati yaratilishi ko‘zda tutilgan. 

Bundan tashqari, tashabbuslar uchun ovoz berishning shaffofligi va adolatliligini ta’minlashga qaratilgan boshqa takliflar ishlab chiqilyapti. 

Ma’lumot uchun, “Tashabbusli budjet” loyihasi doirasida ovoz berish jarayoni davom etmoqda. Hozirda jami 33 ming 600 loyiha uchun 10 milliondan ortiq ovoz berildi. 

Birinchi mavsumda fuqarolar tomonidan 55 mingdan ortiq tashabbuslar bildirildi. Eng ko‘p ovoz yig‘ib, g‘olib chiqqan loyihalarni moliyalashtirishga 1,7 trillion so‘m pul ajratiladi. 

Avvalroq, Maktabgacha va maktab ta’limi vazirligi “Tashabbusli budjet” doirasida o‘qituvchilarni ovoz berishga majburlash holatlari yuz berayotgani haqida ijtimoiy tarmoqlarda tarqalgan xabarlarni o‘rganishi ma’lum qilingandi.