Ammo “Tashabbusli byudjet”da tanlov bu bilan tugamadi. Navbat - deputatlarga keldi.
Bu mavsumda jarayonda muhim yangilik bor: deputatlar endi bitta emas, ajratilgan mablagʻ doirasida bir nechta loyihani qoʻshimcha gʻolib sifatida tanlashi mumkin.
Bunday imkoniyat Prezident Shavkat Mirziyoyevning joriy yil 29-iyundagi qarori bilan belgilandi. Avvalgi tartibga koʻra, deputat har bir mavsumda ovoz berishda gʻolib boʻlmagan loyihalar orasidan faqat bittasini qoʻshimcha gʻolib sifatida tanlashi mumkin edi. Endi esa bir saylov okrugidagi bir nechta muhim muammoni bir vaqtning oʻzida hal etishga qaratilgan loyihalarni qoʻllab-quvvatlash imkoni paydo boʻldi.
Endi masala faqat “qaysi loyiha koʻp ovoz oldi?” degan savol bilan cheklanmaydi. Boshqacha aytganda, saylov okrugida bir nechta muhim muammo mavjud boʻlsa, deputat ulardan faqat bittasini tanlash bilan cheklanib qolmaydi. Ajratilgan mablagʻ imkon bersa, bir nechta hududdagi muammoni hal etishga qaratilgan loyihalarni ham qoʻllab-quvvatlashi mumkin.
Joriy yilning 2–6-sentabr kunlari Qonunchilik palatasi deputatlari oʻz saylov okruglarida boʻlib, ovoz berishda gʻolib boʻlmagan loyihalar bilan tanishdi, aholi bilan uchrashdi va qaysi tashabbuslar qoʻshimcha qoʻllab-quvvatlashga munosib ekanini oʻrgandi.
Jarayon yakunlari boʻyicha deputatlar jami 346 ta loyihani qoʻshimcha gʻolib deb topdi. Ularni amalga oshirishga 240,3 milliard soʻm yoʻnaltiriladi. Loyihalar 145 ta tuman va shahardagi 343 ta mahallani qamrab oldi.
Yangi tartibning amaliyotdagi natijalari ham qiziq. 149 deputatning 93 tasi ajratilgan mablagʻni bitta yirik loyihaga yoʻnaltirgan boʻlsa, 56 tasi uni bir nechta loyihaga boʻlgan. Masalan, Dilnoza Azizova 17 ta, Jasurbek Shodiyev 12 ta, Zebiniso Rahmonova 10 ta, Goʻzal Samiyeva 9 ta, Firdavs Sharipov 8 ta, Odiljon Tojiyev 8 ta, Abdullo Aslonov 7 ta loyihani qoʻllab-quvvatlagan.
Tanlangan tashabbuslar esa, asosan, odamlarning kundalik hayotiga bevosita taʼsir qiluvchi masalalarga borib taqaladi: yoʻl, elektr, ichimlik suvi, mahalla infratuzilmasi, bolalar va sport maydonchalari.
Raqamlar ham shuni tasdiqlaydi. 346 ta loyihaning 119 tasi ichki yoʻllarni taʼmirlashga qaratilgan boʻlib, ularga umumiy mablagʻning 41 foizi - 98,9 milliard soʻm yoʻnaltirilgan; bu orqali jami 156,8 kilometr yoʻl asfaltlanadi. Elektr taʼminoti va koʻcha chiroqlari boʻyicha 92 ta, umumtaʼlim maktablari va maktabgacha taʼlim muassasalari boʻyicha 54 ta, bolalar maydonchalari boʻyicha 20 ta, sogʻliqni saqlash muassasalari boʻyicha 14 ta, ichimlik suvi boʻyicha 13 ta loyiha tanlangan.
