Rossiya Qurolli kuchlari uzoq masofali bombalardan faol foydalanmoqda, Ukraina Qurolli kuchlari ularni qaytara olmaydi, deya ma’lum qildi Ukraina harbiy-havo kuchlari vakili Yuriy Ignat milliy telemarafon efirida.
«Tinchlik yo‘q. Dushman aviatsiyasi, afsuski, ishlamoqda va kecha bir necha bor xabarlarda aytilgan ediki, ular o‘nlab kilometrlar, taxminan 70 kilometrgacha ucha oladigan maxsus bombalardan foydalana boshladi. Dushman kuniga 10-15 tadan 20 tagacha bombani bizning havo mudofaa tizimimizning kirish imkoni deyarli yo‘q bo‘lgan hududlarga Su-35, Su-34 samolyotlaridan tashlamoqda, bu demarkatsiya chizig‘i bo‘ylab ro‘y beryapti», dedi Ignat.
Uning so‘zlariga ko‘ra, bu Ukraina uchun yangi tahdid bo‘lib, unga zudlik bilan javob berish kerak, ammo hozircha buning oldini oladigan hech narsa yo‘q.
«Bu samolyotlarni chegaralarimizdan uzoqlashtirish uchun bizga Patriot kabi uzoq masofali uchuvchi tizimlar va havo mudofaa tizimlari kerak. Albatta, bizga uzoq masofalarda «havo-havo» raketalarini ishlata oladigan qiruvchilar ham kelishi lozim», - deya ta’kidlab o‘tdi Ignat.
Bundan oldin Daniya va Norvegiya Mudofaa vazirliklari birgalikda Ukrainaga 8000 dona 155 millimetrli artilleriya snaryadlarini topshirishga kelishib olgandi.
Qayd etilishicha, ikki davlat tomonidan ishlab chiqarilgan butlovchi qismlardan o‘q-dorilarni yig‘ish keyinchalik Ukraina tomoniga o‘tkazish uchun Daniyada amalga oshiriladi.
Snaryadlarni ishlab chiqarish va yetkazib berish muddati ko‘rsatilmagan. Ammo, o‘q-dorilar CAESAR o‘ziyurar artilleriya moslamalari (O‘AM) uchun mos keladi, uni Ukrainaga beg‘araz tarzda yetkazib berish Daniya parlamenti tomonidan yil boshida ma’qullangan.
