Foto: Vulqon tufayli Kamchatkadagi qishloq kul qatlami ostida qoldi

11 aprelga o‘tar kechasi Kamchatkada Shiveluch vulqoni uyg‘onishi boshlandi. Vulqon kuli atrofdagi aholi yashash manzillari ustiga yopirildi.

Kul 20 kilometr balandlikka ko‘tarilgan - bu Shiveluchni kuzatish tarixidagi eng yuqori balandlik. Natijada vulqonga yaqin hududlarda aviatsiya xavfsizligi bilan bog‘liq qizil rejim e’lon qilingan. 

«Kul buluti Shiveluchdan 500 kilometr shimoli-g‘arbga tarqalgan va tarqalishda davom etmoqda. Ust-Kamchatskiy rayonining Klyuchi va Kozirevsk posyolkalariga kul yog‘ishi kuchayib bormoqda», degan Rossiya fanlar akademiyasi Uzoq Sharq bo‘limi vulqonshunoslik va seysmologiya instituti direktori Aleksey Ozerov.

Uning so‘zlariga ko‘ra, Klyuchi - Ust-Kamchatsk yo‘li hududida loy oqimi xavfi saqlanib qolmoqda.

Noqulay ob-havo sharoiti (qor va qorbo‘ronlar) tufayli Shiveluch vulqonining videokuzatuvini olib borish murakkablashgan.

11 aprel kuni kul va qor yog‘ishi oqibatida ikkita aholi yashash punkti - Kozirevsk posyolkasi va Mayskoye qishlog‘i elektr ta’minotisiz qolgan.

FVV xabariga ko‘ra, boshqa hududlarda, jumladan o‘lka markazi hisoblangan Petropavlovsk-Kamchatskda ham kul yog‘ishi ehtimoli istisno qilinmaydi.

«Shamol yo‘nalishi o‘zgarishi munosabati bilan Bistrinskiy, Milkovskiy, Tigilskiy, Yelizovskiy rayonlari va Petropavlovsk-Kamchatsk hududiga vulqon kuli tushishi ehtimoli istisno etilmaydi», deyilgan FVVning mintaqaviy boshqarmasi xabarida.

Shiveluch Petropavlovsk-Kamchatsk shahridan 440 km masofada joylashgan va yarimorolning eng yirik va eng shimoldagi faol vulqonlaridan biri hisoblanadi.

Olimlar Shiveluchda kuchli otilish boshlanishini bir necha oy muqaddam prognoz qilishgandi.

O‘tgan yil dekabrida Rossiya Fanlar akademiyasining Kamchatkadagi geofizika xizmati mutaxassislari vulqonda yuqori faollikni qayd etishgandi. O‘shanda ham uzluksiz ravishda tepalik yonbag‘irlaridan kichik ko‘chkilar tusha boshlaydi, yirik ko‘chkilar esa - har soatda bir marta kuzatiladi. Bundan tashqari, vulqon vaqti-vaqti bilan bir necha ming metrga kul ota boshlagandi.