O‘zbekistonda Yevropa kuni o‘tkaziladi

4 may kuni Yevropa ittifoqining O‘zbekistondagi delegatsiyasi Yevropa kuni tadbirlariga start beradi. Bu haqda “Dunyo” axborot agentligi xabar bermoqda.

2023 yilda Yevropa kuni ham Yevropada, ham O‘zbekistonda inson kapitaliga urg‘u bergan holda, Yevropa ko‘nikmalar yili doirasida o‘tkaziladi. Shuningdek, Umumjahon inson huquqlari deklaratsiyasining 75 yilligi ham diqqat markazida bo‘ladi.

“Biz moliyalashtiradigan loyihalar va dasturlar orqali ayollar, yoshlar va qishloq aholisini bugungi kunda talabgir bo‘lgan va ularning yanada takomillashishi va rivojlanishiga xizmat qiluvchi kasbiy ko‘nikmalar bilan ta’minlaymiz”, – dedi Yevropa Ittifoqining O‘zbekistondagi elchisi Sharlotta Adrian.

YeIning O‘zbekistondagi delegatsiyasi Yevropa kuni doirasida qator tadbirlar tashkil etadi.

Jumladan, 5 may kuni Alisher Navoiy nomidagi Davlat akademik opera va balet teatrida klassik musiqali konsert o‘tkaziladi. 6 may kuni esa Toshkent botanika bog‘ida Yevropa kuni festivali bo‘lib o‘tadi.

Festival Yevropa va O‘zbekiston o‘rtasida ta’lim va boshqa sohalardagi ikki tomonlama hamkorlikning ahamiyatini, Yevropa Ittifoqiga a’zo mamlakatlar madaniyati va an’analarining turfa xilligini namoyish etadi, hamkorlik doirasida taklif etilayotgan istiqbollarni o‘rganish imkonini beradi.

Shuningdek, festival keng auditoriya uchun ko‘ngilochar dasturga ham ega: o‘zbek estradasi yulduzlarining chiqishlari, turli mavzularga oid fleshmoblar, mahorat saboqlari, ijodiy va sport tadbirlari, shuningdek tashrif buyuruvchilar uchun raqs maydonlari shular jumlasidandir.

Eslatib o‘tamiz, yaqin oylarda O‘zbekiston bilan YeI o‘rtasida Kengaytirilgan sheriklik va hamkorlik to‘g‘risida bitim imzolanishi kutilyapti. Bitim loyihasi yuzasidan muzokaralar muvaffaqiyatli yakunlangan va parafinlangan. Hujjat ichki tartib-qoidalar, shu jumladan huquqiy ekspertiza va tomonlarning davlat tillariga tarjima qilinganidan keyin imzolanadi.