«Novaya gazeta Yevropa» Belgorod oblastiga reydda ishtirok etganlardan birining hikoyasini keltirdi. Nashr suhbatdoshi o‘z shaxsini va qaysi tuzilmaga mansubligini ochiqlamagan (aksiyada ishtirok etganini «Rossiyaga ozodlik» va «Rossiya ko‘ngillilar korpusi» (RKK) ma’lum qilgan). U faqat Rossiya fuqarosi ekaniga oydinlik kiritgan.
Reyd ishtirokchisi yomon ob-havo va yo‘llar yuvilib ketgani tufayli «operatsiyani belgilangan muddatda boshlash» imkoni bo‘lmaganini aytgan. «Ko‘plab mashinalar botqoqqa botib qoldi, hatto ularning ba’zilari keyingi harakatlarda ishtirok eta olmadi», — degan u va chegaragacha «o‘nta mashina va zirhli avtomobillar» hamda 150 nafarga yaqin kishi yetib bora olganini qo‘shimcha qilgan.
«Ukraina tomonidan «Uragan» baravar o‘t ochish reaktiv tizimlaridan hech qanday zarba berilgani yo‘q. Biz o‘zimiz chegaradagi «Grayvoron» nazorat-o‘tkazish punktini 120 mm kalibrli minomyotlardan o‘qqa tutdik», — degan suhbatdosh. Uning so‘zlariga ko‘ra, chegara punkti yaxshi mustahkamlangandi, ammo, «guruh tank ko‘magida hujumga o‘tganida, barcha himoyachilar qochib qolishgan». Reyd ishtirokchisining so‘zlariga ko‘ra, qochayotganlardan biri o‘qqa uchib halok bo‘lgan. Yerto‘lada bir necha soat yashirinib yotgan yana bir chegarachi asir tushgan.
U shuningdek Amerikaning ikkita HMMWV mashinasi aks etgan kadrlar voqea joyida bo‘lganini tasdiqladi, uning aytishicha, jiplar nazorat-o‘tkazish punktidagi okoplarga tiqilib qolgan.
«Nazorat-o‘tkazish punkti egallangach, biz belgilangan yo‘nalishlar bo‘ylab tarqala boshladik. Birinchi guruh borib, tinch aholini uylaridan chiqmaslik to‘g‘risida ogohlantirdi. Ular rayon markazigacha tez yetib borishdi. Ikkinchi to‘lqin o‘tayotganida, men uning ichida edim, qishloqlarda tirik jon yo‘q edi. Ko‘chalar kimsasiz bo‘lib qolgandi», deydi u.
Nashr suhbatdoshining so‘zlariga ko‘ra, Rossiya kuchlari faqat bir necha soat o‘tganidan keyin «uyg‘ongan» va o‘z qismlari, artilleriya va aviatsiyani olib kelib, o‘t ocha boshlagan, lekin faqat «RKK va «Rossiyaga ozodlik» legioni jangchilari turgan chekkalar emas, balki, ular diversantlar egallab olganini taxmin qilgan binolar ham nishonga olingan — FXX, IIV, ma’muriyat binolari.
Reyd ishtirokchisi uning quroldoshlari orasida yengil jarohat olganlar bo‘lganini ma’lum qilgan, shu bilan birga, guvohlarning so‘zlariga ko‘ra, tinch aholi vakillari orasida yaradorlar ham ko‘p bo‘lgan. Uning aytishicha, Rossiya harbiylari orasida anchagina kishi o‘lgan va yaralangan.
