Maurisio Pochettino «Chelsi»ning yangi bosh murabbiyiga aylandi. Bu haqda klub rasmiy sayti xabar bermoqda.
Foto: Getty Images
Argentinalik mutaxassis 1 iyul kunidan London jamoasida ish boshlaydi. Pochettino va «Chelsi» o‘rtasida ikki yillik shartnoma imzolanib, kelishuvni yana bir yilga uzaytirish bandi ham kiritilgan.
Klub Grem Potterni iste’foga chiqargach, mavsum yakuniga qadar «Chelsi»da bosh murabbiy vazifasini bajaruvchi sifatida Frenk Lempard faoliyat yuritdi. Bu o‘zgarishga qaramay, «Chelsi» mavsumni 12-o‘rinda yakunladi. Bu so‘nggi 29 yil ichida klubning eng yomon natijasi.
Pochettinoning so‘nggi ish joyi «PSJ» bo‘lib, 51 yoshli argentinalik Parij klubidan 2022 yilning yozida iste’foga chiqarilgandi. Bungacha u «Tottenhem»ga 5 yildan ortiq murabbiylik qilgan.
