Rossiya FXX Simonyan va Sobchakka suiqasd tayyorlangani haqida xabar berdi

FXX xabariga ko‘ra, Rossiya Tergov qo‘mitasi qo‘lga olinganlarga nisbatan ekstremizm va terrorizm ayblovi bo‘yicha ish ochadi.

Simonyan – Rossiya «propaganda malikasi»

Go‘yoki Ukraina o‘ldirilishini buyurtma qilgan ikki jurnalistdan biri – Margarita Simonyan. Beslan voqealaridagi shov-shuvli reportaji (asir olinganlar sonini kamaytirib aytgan) bilan tanilgan arman millatiga mansub Simonyan hozirda Rossiyaning bosh propagandachilaridan biri hisoblanadi. U Kreml propagandasini xorijiy tillarga tarqatuvchi «Russia Today» telekanali bosh muharriri hamdir. Unin turmush o‘rtog‘i, arman millatiga mansub Tegran Keosayan bilan birga uzoq vaqtdan buyon Rossiya hukumat pozitsiyasini ifoda etib keladi. Rossiyaning Ukrainaga bosqinini faol qo‘llaydi va urushga targ‘ib qiladi.

Rossiyada Simonyanga suiqasd haqida avval ham xabarlar berilgan. Masalan, propagandachining o‘zi urush boshlanganidan 3 oy o‘tib uni o‘ldirmoqchi bo‘lishganini aytgandi. Uning so‘zlariga ko‘ra, ishxonasiga portlovchi modda izi bo‘lgan jo‘natma yuborilgan. Bu xabardan biroz avval Vladimir Putin mamlakat bosh propagandachisi Vladimir Solovevga suiqasd uyushtirishga urinish bartaraf etilganini aytgandi.

Simonyan o‘ziga nisbatan tashkillashtirilgani iddao qilingan suiqasdga munosabat bildirdi. «Federal xavfsizlik xizmati, Ichki ishlar vazirligi hamda Tergov qo‘mitasi Ukraina buyurtmasiga ko‘ra meni o‘ldirishga chog‘langan guruhni qo‘lga oldi. Meni kuzatishgan, manzillarimni bilishgan. Bo‘shashmaymiz, do‘stlar!» deb yozdi Simnoyan o‘z kanalida.

Keyinroq u sharmandalik o‘limdan ham yomon narsa ekanini aytib, video e’lon qildi. Darvoqe, FXX qo‘lga olgan Rossiya fuqarosining «iqrori» ham aynan Rossiya «propaganda malikasi» rahbarlik qiladigan RT telekanalida e’lon qilindi.

Sobchak – liberallar xushlamaydigan «liberal»

Kseniya Sobchak Rossiyadagi eng mashhur jurnalistlardan biri va muxolif siyosatchi hisoblanadi. U 2018 yil Rossiya prezidentligiga nomzod ham bo‘lgan va sharmandali natija qayd etgan (1,68 foiz). Sobchak Rossiyaning o‘zgarmas prezidenti Putinning sobiq ustozi, Peterburgning sobiq meri Anatoliy Sobchakning qizi hisoblanadi. Sobchak Putinga aloqasi borligini rad etib kelsa-da, Rossiyadagi liberal siyosatchilar uni xushlamaydi.

Prigojinning isyoni vaqtida Sobchak yozib qoldirgan ushbu post uni navbatdagi tanqidlar girdobida qoldirgandi: «Xullas, mana bunaqa gap, o‘rtoqlar: harbiy holatdagi isyon har qanaqasiga jang qilayotgan narigi tomon foydasiga ishlaydi. Bu nafaqat frontdagilar, balki tinch aholi uchun ham xavfni oshiradi».

Sobchak ham FXX e’lon qilgan suiqasd haqidagi xabarga munosabat bildirdi. «Agar bu rost bo‘lsa, uni bartaraf etishda ishtirok etgan hammaga rahmat. Agar bu yolg‘on bo‘lsa va maqsad meni Simonyan bilan bir qatorga qo‘yish bo‘lsa, bu – pastkashlik. Har qanday holatda terror bu – zulmkorlik, hech qanday istisnosiz», deb yozdi Sobchak o‘z kanalida.

Kiyev rad etdi

Ukraina tomoni rossiyalik jurnalist ayollarni o‘ldirishga urinishga aloqasi yo‘qligini ma’lum qildi. «Ularning bizga umuman keragi yo‘q, bu ko‘rinib turgan narsa. Axir bu insonlar hech narsaga ta’sir qila olmaydi», dedi Ukraina prezident devoni vakili Mixaylo Podolyak. Uning fikricha, Simonyan ham, Sobchak ham urush natijasiga va Rossiyaning global dunyodagi pozitsiyasini yo‘qotishiga hech qanday ta’sir qilish kuchiga ega emas.