Qamoqqa olish tarzidagi ehtiyot chorasi qo‘llangan shaxslar majburiy tibbiy ko‘rikdan o‘tkaziladi

“Jinoyat ishini yuritish chog‘ida qamoqda saqlash to‘g‘risida”gi qonunga qo‘shimcha kiritish to‘g‘risida”gi qonun loyihasi e’lon qilindi.

“Jinoyat ishini yuritish chog‘ida qamoqda saqlash to‘g‘risida”gi qonun 3-bobi 271-modda bilan to‘ldiriladi. U qamoqqa olish tarzidagi ehtiyot chorasi qo‘llanilgan ushlab turilganlarni majburiy tibbiy ko‘rikdan o‘tkazish bilan bog‘liq.

O‘ziga nisbatan qamoqqa olish tarzidagi ehtiyot chorasi qo‘llanilishi to‘g‘risida sudning ajrimi qabul qilingan shaxs tergov hibsxonasiga joylashtirilishidan oldin davlat sog‘likni saqlash muassasasida unda qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlari qo‘llanilganligi natijasida olingan jarohatlarni, shikastlanishlarni va yaralarni aniqlash maqsadida majburiy tibbiy ko‘rikdan o‘tkaziladi.

Qamoqqa olish tarzidagi ehtiyot chorasi qo‘llanilgan shaxsni davlat sog‘liqni saqlash muassasasida majburiy tibbiy ko‘rikdan o‘tkazish uchun sudning ushlab turilgan shaxsga qamoqqa olish tarzidagi ehtiyot chorasini qo‘llash to‘g‘risidagi ajrimida ushbu shaxsni majburiy tibbiy ko‘rikdan o‘tkazish to‘g‘risidagi topshirig‘i asos bo‘ladi.

Qamoqqa olish tarzidagi ehtiyot chorasi qo‘llanilgan shaxsni davlat sog‘liqni saqlash muassasasiga majburiy tibbiy ko‘rikdan o‘tkazish uchun yetkazish qo‘riqlov ostida amalga oshiriladi.

Qamoqqa olish tarzidagi ehtiyot chorasi qo‘llanilgan shaxsni davlat sog‘liqni saqlash muassasasida majburiy tibbiy ko‘rikdan o‘tkazish uni qo‘riqlayotgan (konvoy qilayotgan) huquqni muhofaza qiluvchi organ xodimlari (harbiy xizmatchilari) hamda majburiy tibbiy ko‘rikdan o‘tkazilayotgan shaxsning advokati ishtirokida amalga oshiriladi.

Davlat sog‘liqni saqlash organlarining majburiy tibbiy ko‘rikdan o‘tkazishni amalga oshirishga ruxsat berilgan tibbiyot muassasalari ro‘yxati, tibbiy ko‘rikdan o‘tkazish tartibi va tibbiy tekshiruv natijalariga doir xulosaning shakli O‘zbekiston Respublikasi Sog‘liqni saqlash vazirligi tomonidan Oliy Majlis Inson huquqlari bo‘yicha vakili (ombudsman) bilan kelishilgan holda belgilanadi.

Majburiy tibbiy ko‘rikdan o‘tkazishni amalga oshirishga ruxsat berilgan tibbiyot muassasalarida majburiy tibbiy ko‘rikdan o‘tkazish joyi, shuningdek majburiy tibbiy ko‘rikdan o‘tkaziladigan shaxsni qo‘riqlash tartibi Ichki ishlar vazirligi va Sog‘liqni saqlash vazirligi tomonidan Davlat xavfsizligi xizmati va Oliy Majlis Inson huquqlari bo‘yicha vakili (ombudsman) bilan kelishilgan holda belgilanadi.

Majburiy tibbiy ko‘rik tibbiyot muassasasi tomonidan sudning ushlab turilgan shaxsga qamoqqa olish tarzidagi ehtiyot chorasini qo‘llash to‘g‘risidagi ajrimi va unda ko‘rsatilgan shaxsning shaxsini tasdiqlovchi (identifikatsiyalovchi ID-kartasi, pasporti yoki shaxsni tasdiqlovchi boshqa) hujjati asosida o‘tkaziladi.

Majburiy tibbiy ko‘rik tibbiyot muassasalari tomonidan sudning ushlab turilgan shaxsni qamoqqa olish tarzidagi ehtiyot chorasini qo‘llash to‘g‘risidagi ajrimi tibbiyot muassasasi ma’muriyatiga taqdim etilgan paytdan e’tiboran bir soatlik muddat ichida o‘tkaziladi.

Majburiy tibbiy ko‘rik davomida shaxsda jarohatlar, shikastlanishlar va yaralar mavjudligi yoki mavjud emasligi tekshiriladi hamda majburiy rentgenoflyurografik tekshiruvidan o‘tkaziladi.

Majburiy tibbiy ko‘rik natijalari qayd etilgan tibbiy xulosa tibbiy ko‘rikni o‘tkazishda ishtirok etgan shifokor va mutaxassislar tomonidan uch nusxada to‘ldirilib, ularning imzolari va tibbiyot muassasasining muhri bilan tasdiqlanadi.

Majburiy tibbiy ko‘rik davomida shaxsning tanasida jarohatlar, shikastlanishlar va yaralar aniqlangan taqdirda ular belgilangan tartibda qayd etiladi va majburiy tibbiy ko‘rikdan o‘tgan shaxsga va uning advokatiga ma’lum qilinadi, shuningdek zudlik bilan nazorat qiluvchi prokuratura organlariga hamda Oliy Majlis Inson huquqlari bo‘yicha vakiliga (ombudsmanga) va/yoki uning mintaqaviy vakiliga xabar beriladi.

Majburiy tibbiy ko‘rik davomida shaxsning tanasida aniqlangan jarohatlar, shikastlanishlar va yaralar yuzasidan prokuratura organlari tomonidan tergovga qadar tekshiruv harakatlari o‘tkaziladi.

Majburiy tibbiy ko‘rik natijalari bo‘yicha tibbiy xulosaning bir nusxasi  majburiy tibbiy ko‘rikdan o‘tkazilgan shaxsning yig‘ma jildiga tikiladi, bir nusxasi majburiy tibbiy ko‘rikdan o‘tkazilgan shaxsning advokatiga beriladi, bir nusxasi esa tibbiyot muassasasida qoladi.

Majburiy tibbiy ko‘rikdan o‘tkazilgan shaxs tergov hibsxonasiga topshiriladi.

Majburiy tibbiy ko‘rikdan o‘tkazilganligini tasdiqlovchi tibbiy xulosasi bo‘lgan shaxsni tergov hibsxonasiga qabul qilishda boshqa tibbiy hujjatlarni talab qilish yoki qo‘shimcha tibbiy tekshiruvlarni o‘tkazishni talab qilishga yo‘l qo‘yilmaydi.

Majburiy tibbiy ko‘rikdan o‘tkazish tartibi qamoqqa olish tarzidagi ehtiyot chorasi qo‘llangan ushlangan qidiruvda yurgan shaxslarga ham amal qiladi.

Qamoqqa olish tarzidagi ehtiyot chorasi qo‘llanib, belgilangan tartibda majburiy tibbiy ko‘rikdan o‘tkazilgan holda hibsxonaga joylashtirilgan shaxslar bir muassasadan boshqa muassasaga ko‘chirilganida yoki protsessual harakatlarga olib chiqilib muassasaga qaytarilganida ularni tibbiy ko‘rikdan o‘tkazish ushbu shaxsni qabul qilib olayotgan muassasalarning tibbiyot xodimlari tomonidan ichki tartib-qoidalariga belgilangan tartibda amalga oshiriladi.