KXDR Janubiy Koreyadagi nishonlarga yadroviy zarba berish bo‘yicha mashq o‘tkazdi

Shimoliy Koreya Janubiy Koreya bo‘ylab nishonlarga yadro kallaklari bo‘lgan raketalar uchirish simulyatsiyasini o‘z ichiga olgan mashg‘ulotlar o‘tkazdi, deb xabar bermoqda Reuters 31 avgust, payshanba kuni Koreya markaziy axborot agentligiga (KMAA) tayanib.

Koreya xalq armiyasi bosh shtabining mahalliy televideniyedagi bayonotiga ko‘ra, Janubiy Koreyadagi «yirik qo‘mondonlik markazlari va operativ aerodromlar»ga simulyatsiya qilingan yadro zarbalari Pxenyanning avgust oyi oxirida Janubiy Koreya AQSh bilan hamkorlikda o‘tkazgan harbiy mashg‘ulotlariga javobi bo‘ldi. Bu harakatlar KXDR tomonidan «AQShning ogohlantiruvchi yadroviy zarba berish rejalariga teng qadam sifatida baholandi», deya yozadi Reuters. 

Mashqlar doirasida Pxenyan dengizga ikkita qisqa masofali ballistik raketa uchirdi, ular soxta nishonlardan 400 metr balandlikda havoda portladi. Bu AQSh mintaqaga B-1 Lancer bombardimonchilarini joylashtirib, Seul bilan qo‘shma mashg‘ulotlarning havo-desant qismini boshlaganidan bir necha soat o‘tib sodir bo‘ldi. 

Mashg‘ulotlar boshlanishidan biroz oldin Shimoliy Koreya yetakchisi Kim Chen In «harbiy sanoatning barcha korxonalarini har xil turdagi qurol va jihozlarni ommaviy ishlab chiqarishni jadallashtirishga» chaqirdi, deya xabar beradi KMAA. «Shuningdek, u qurol-yarog‘ va texnikaning so‘nggi namunalaridan samarali foydalanish maqsadida haqiqiy harbiy mashg‘ulotlarni faol o‘tkazishga chaqirdi», — deyiladi agentlik xabarida. 

AQShdan qochgan harbiy hamon KXDRda 

Avvalroq KXDR rasmiylari amerikalik harbiy Trevis K.ning Janubiy va Shimoliy Koreya o‘rtasidagi demarkatsiya chizig‘ini kesib o‘tishi bilan bog‘liq hodisa haqida bayonot bergan edi. Bu iyul oyi o‘rtalarida sodir bo‘lgan, shundan so‘ng harbiy Shimoliy Koreya chegarachilari tomonidan qo‘lga olingan. Hozirda uning qayerdaligi noma’lum va AQSh rasmiylari u bilan uchrasha olmayapti, chunki mamlakatlar o‘rtasida diplomatik aloqalar mavjud emas. 

Pxenyan bayonotiga ko‘ra, Trevis K. «tenglik yo‘q Amerika jamiyatidan hafsalasi pir bo‘lgani uchun» mamlakatdan boshpana so‘rash maqsadida KXDRga noqonuniy ravishda kirganini aytgan. Shuningdek, KXDR ma’lumotlariga ko‘ra, amerikalik harbiy «AQSh armiyasidagi g‘ayriinsoniy muomala va irqiy kamsitish» haqida gapirgan. 

Vashington KXDR va Rossiya o‘rtasidagi hamkorlik haqida xabar berishda davom etmoqda 

Avgust oyi o‘rtalarida AQSh Vashington Shimoliy Koreya va Rossiya o‘rtasidagi qurol-yarog‘ savdosi bilan bog‘liq deb hisoblagan uchta kompaniyaga nisbatan sanksiyalar kiritgan edi. AQSh Moliya vazirligi ma’lumotlariga ko‘ra, ushbu kompaniyalarni nazorat qiluvchi Slovakiya fuqarosi Ashot Mkrtichev KXDR va Rossiya o‘rtasida Shimoliy Koreyaga tovarlar evaziga 20 dan ortiq turdagi qurol va o‘q-dorilarni Rossiyaga o‘tkazish bo‘yicha muzokaralar olib borgan. 

Shu fonda AQSh Moliya vazirligi Rossiya Ukrainadagi urushda yo‘qotayotgan o‘q-dori va qurol-yarog‘lar uchun KXDR va boshqa ittifoqchilarga tobora ko‘proq murojaat qilishga majbur bo‘layotganini aytdi. Buni Rossiya mudofaa vaziri Sergey Shoyguning iyul oyi oxirida bo‘lib o‘tgan KXDRga tashrifi tasdiqlashi mumkin.