Xarkivda yangi mudofaa chizig‘i va Donbassdagi merganlar. Urush suratlari

Ukrainada urushning 671-kuni o‘tdi. Asosiy ma’lumotlar:

Ukraina qurolli kuchlari Feodosiyada «Novocherkassk» yirik desant kemasi yo‘q qilingani haqida xabar berdi. Rossiya mudofaa vazirligi kemaga hujum faktini tasdiqlagan korabl va ukrainlarning raketa uchirgan ikki samolyoti urib tushirilganini ma’lum qilgan. Ijtimoiy tarmoqlarda hujum oqibatida butkul yakson etilgan kema qoldiqlari suratlari tarqalgan. 33 nafar dengizchi bedarak yo‘qolgan deb hisoblanmoqda.
RF mudofaa vaziri Sergey Shoygu «maxsus harbiy amaliyot»ning 2023 yildagi asosiy maqsadi ukrainlarning qarshi hujumini bardod qilish bo‘lganini va bu vazifa bajarilganini ma’lum qildi.
Ukraina Oliy radasiga safarbarlik qoidalarini o‘zgartirish to‘g‘risidagi qonun loyihasi kiritildi. Unga ko‘ra, chaqiruv qog‘ozini elektron shaklda yetkazish, harbiy xizmatdan bo‘yin tovlovchilarning huquqlarini cheklash ko‘zda tutilgan.
Ukraina QK bosh qo‘mondoni Valeriy Zalujniy ukrain harbiylari Donetsk oblastining Maryinka shahridan chekinganini tasdiqladi. Rossiya ushbu shahar egallangani haqida 25 dekabr kuni e’lon qilgan, ukrain tomoni bu ma’lumot «to‘g‘ri emasligi»ni bildirgandi.
Turkiya parlamentining xalqaro ishlar bo‘yicha qo‘mitasi Shvetsiyaning NATOga a’zoligini qo‘llab-quvvatladi. Endi protokol butun parlament tomonidan tasdiqlanishi kerak, ammo ovoz berish kuni hozircha aniq emas. Turkiya bir yarim yildan oshiq vaqt davomida Shvetsiyaning alyansga qabul qilinishiga qarshi bo‘lib kelayotgandi.

Ukraina qurolli kuchlarining Xarkiv ostonasidagi mudofaa liniyasi

Rossiya qo‘shini Xarkiv oblastida yurish qilishda davom etmoqda. Buni sekinlashtirish uchun so‘nggi oylarda ukrain harbiylari bu yo‘nalishda yangi mudofaa chizig‘ini barpo etishdi — 19 dekabr kuni yil yakunlariga bag‘ishlangan matbuot anjumanida Volodimir Zelenskiy uni butun Ukrainadagi «eng kuchli» mudofaa chizig‘i deb atadi. Mudofaa chizig‘i temir beton boshpanalar, «ajdarho tishlari», tankka qarshi ariqlar, blindajlar va boshqa mudofaa istehkomlaridan tarkib topgan.