Toshkent shahri Fitch reytingiga qaytishi mumkin

Xalq deputatlari Toshkent shahri kengashi hokimlikning shahar reytingini baholash uchun Fitch Ratings xalqaro reyting agentligini jalb etish to‘g‘risidagi taklifini ma’qulladi.

“Fitch Ratings reyting agentligining so‘roviga ko‘ra, 5 kun muddatda Toshkent shahrining xalqaro reytingdagi o‘rnini baholash uchun taqdim etilishi lozim bo‘lgan ma’lumotlar o‘rnatilgan tartibda o‘z vaqtida va sifatli taqdim etilishi ta’minlansin”, deyiladi qarorda.

Shuningdek, Toshkent shahar hokimining o‘rinbosarlari poytaxtning xalqaro reytingdagi o‘rnini aniqlash bo‘yicha Fitch Ratings agentligi bilan kelishuv bitimini imzolash yuzasidan tegishli choralarni ko‘rishi belgilangan.

Ma’lumot uchun, 2019 yilning iyun oyida Fitch Ratings agentligi Toshkentga suveren reyting darajasida “Barqaror” prognozi bilan uzoq muddatli “BB-“ reytingini bergandi. 2023 yilning dekabr oyi boshida agentlik Toshkentning kredit reytinglari qaytarib olinishini e’lon qildi. Bunga sabab sifatida poytaxtning reyting jarayonida ishtirok etmaslikka qaror qilgani keltirib o‘tilgandi.

Fitch Ratings AQSh moliyaviy korporatsiyasi bo‘lib, Standard & Poor’s va Moody’s reyting agentliklari bilan bir qatorda, uchta eng nufuzli xalqaro reyting agentligidan biri sifatida ma’lum. Bunday agentliklardan ijobiy reyting olish shahar yoki davlatning investorlar oldida moliyaviy ishonchliligi kafolati hisoblanadi.