Vengriya O‘zbekiston mahsulotlarining Yevropa bozoriga kirishi uchun hab vazifasini bajarishga tayyor

Muzokaralar davomida Gilan Trading Kft kompaniyasi quritilgan meva va sabzavotlarni qayta ishlash va sotish borasida nafaqat Vengriya, balki Yevropa bozorlarida ham yetakchi ekani ma’lum qilindi.

Umar Sharxon mamlakatda quritilgan meva va sabzavotlarni eksport qiluvchi korxonalarga qayta ishlash va qadoqlash jarayonlarini sifatli amalga oshirishda o‘z maslahatlarini berishga hamda O‘zbekistonning Yevropa bozoriga kirishi uchun hab vazifasini bajarishga tayyor ekanini ma’lum qildi.

Kompaniyaning jamoatchilik bilan aloqalar bo‘yicha menejeri Piter Deminger o‘z intervyusida Yevropa bozorlariga quritilgan mevalarni yetkazib berishda O‘zbekiston bilan hamkorlikni kengaytirishga katta ahamiyat qaratishini ta’kidladi:

– Mamlakatingiz bilan hamkorlik bo‘yicha ma’lum tajribaga egamiz. Biroq bugungi kunda O‘zbekistondan sotib olayotgan mahsulotlarimiz yetarli darajada emas. Biz ularni kengaytirishga tayyormiz. O‘zbekiston qishloq xo‘jaligi mevalarining markaziga aylanishdan manfaatdormiz. Kompaniyamiz Lidl, Aldi, Spar, Metro va boshqalar kabi Yevropaning eng yirik tarmoqlariga quritilgan mevalarning asosiy yetkazib beruvchilaridan biri hisoblanadi. O‘zbekiston elchisi bilan mamlakatingizdan quritilgan mevalar yetkazib berishni ko‘paytirish bo‘yicha chora-tadbirlarni atroflicha muhokama qildik.